Avvalroq Toshkentda soatiga 150 kilometr tezlikda mashina haydagani uchun jarimaga tortilgan Toshkent viloyati Olmaliq shahar hokimi Usmon Rahimovning o‘g‘li Dilshod Ismoilovning bir nechta sheriklari bilan bezorilik qilgani tasvirlangan video tarqalgan edi.
Ko‘p o‘tmay, voqea 2020-yil 28-may kuni Toshkent shahri, Yakkasaroy tumanida sodir bo‘lgani ma’lum bo‘lgan. Dilshod Ismoilovning jinoiy sheriklari — 20 yoshli Mirbosit M., 19 yoshli Elmurod D., 20 yoshli Humoyun A. bilan bezorilik qilib, 56 yoshli Shavkat M. va uning 30 yoshli o‘g‘li Laziz M.ga tan jarohatlari yetkazgan.
Mazkur holat bo‘yicha Jinoyat kodeksining 277-moddasi (bezorilik) bilan jinoyat ishi qo‘zg‘atilgan. Toshkent shahar IIBB bu jinoiy ish haqida 2020-yilning 11-iyunida xabar bergan.
“Xabar.uz” nashrining Bosh prokuratura matbuot xizmatiga tayanib ma’lum qilishicha, janjal natijasida ota-bolaning biriga yengil, ikkinchisiga o‘rtacha og‘ir tan jarohati yetkazilgan. Shuningdek, o‘sha paytda ota-bolalarning qo‘shnisi 1977-yilda tug‘ilgan Akmal A.ga ham o‘rtacha og‘ir tan jarohati yetkazilgani ekspert xulosasi bilan tasdiqlangan.
Biroq pandemiya sabab jinoyat ishi bo‘yicha tergov harakatlari vaqtincha to‘xtatilgan.
Mazkur jinoyat ishi bo‘yicha 2020-yilning 29-sentabr kuni dastlabki tergov tiklangan. Ayni paytda Yakkasaroy tumani IIO FMB tomonidan tergov harakatlari olib borilmoqda.
Izoh (0)