Ona bo‘lishni istamayotgan Xande Erchel, tugatilishi yoki davom ettirilishi noma’lum bo‘lgan “Beqaror”. Turk kinosi yangiliklari

Turk seriallari va undagi rollari bilan mashhurlikka erishgan yulduzlar hayoti va ijodi bilan bog‘liq so‘nggi yangiliklarni e’tiboringizga havola etishda davom etamiz.

Muxlislar yaqin orada “Sadoqatsiz” filmi orqali sevimli aktrisalari Jansu Jereni ko‘rish imkoniyatiga ega bo‘ladi. Aktrisaning o‘zi tomoshabinlarning mazkur loyihaga qiziqish bildirayotganidan xursand ekanini ta’kidlagan holda uning hayotida ham yolg‘on va sotqinlik kuzatilgani, ammo u qahramoni singari reaksiya bildirmaganini qo‘shimcha qilgan.

“Yaxshi va yomon kunda” serialining suratga olish jarayonidan e’lon qilingan yangi suratda bosh qahramonlarni birgalikda ko‘rish mumkin.

“Agentimga qo‘ng‘iroq qiling” serialining ssenariy muallifi Elda Erog‘lu loyihani tark etgan, uning o‘rniga ssenariyni Ekin Atalay yozishi ma’lum qilingan.

Ali Ersan Duru “Eshigimni qoq” serialining suratga olish jarayoniga qo‘shiladi. U 13-qismdan boshlab Efe Akman ismli qahramonni gavdalantiradi. Avvalroq loyihaga Pamir Pekin qo‘shilishi haqida xabar berilgandi, lekin tomonlar kelisha olmagani sabab rejalarga o‘zgartirish kiritilgan.

Ulash Tuna Astepe “Barbaros” serialining suratga olish jarayonlarida ishtirok etish uchun shartnoma imzolagan.

Serenay Sarikayadan nima uchun Deniz Bulutsuz uning obunachilar ro‘yxatidan chiqib ketgani haqida so‘ralganida aktrisa ajablangan va bu savolga javob bermagan. Serenayning ko‘zoynak bilan yaratgan obrazi paparatssi nishonidan chetda qolmagan.

Marie Claire jurnalining oktabr soni muqovasi Xande Erchelning surati bilan bezalgan. Aktrisa bergan intervyusida jiyani Mavi oilasi uchun taqdir tuhfasi ekani, u avvallari ham oilasini yaxshi ko‘rgani, lekin Mavining dunyoga kelishi uni opasi bilan yanada yaqin munosabatda bo‘lishiga sababchi bo‘lganini ta’kidlagan. Ona bo‘lish bilan bog‘liq berilgan savolga Xande bunday rejasi yo‘qligini bildirgan.

“Janob xato” serialining finalidan keyin boshqa loyihalarning ham tugatilishi va ular orasida “Beqaror” borligi haqida mish-mish tarqalgan.

Serial prodyusseri Banu Akseniz esa bunga javoban Twitter sahifasida loyiha tugatilmayotgani, film ijodkorlarining hali tomoshabinlarga aytar so‘zi borligini yozib qoldirgan.

Jan Yaman Italiyaga jo‘nab ketgan, u TV5 kanalidagi teleshoulardan birining mehmoni bo‘lgan. Jan mashhur rejissor Ferzan O‘zpetek bilan suhbatlashgan.