Xonobod shahri hokimi Musaxon Mamadaliyev vafot etdi

Andijon viloyati Xonobod shahri hokimi Musaxon Mamadaliyev 29-sentabr kuni vafot etdi. Bu haqda Andijon viloyati hokimligi matbuot xizmati ma’lum qildi.

Viloyat hokimligi tomonidan xabar berilishicha, Musaxon Mamadaliyev o‘tkir yurak qon-tomir yetishmovchiligi kasalligidan vafot etgan.

Avvalroq Musaxon Mamadaliyevning pnevmoniyadan davolanayotgani haqida xabar berilgandi.

“Daryo” muxbirining aniqlik kiritishicha, Xonobod shahar hokimi so‘nggi marotaba 2020-yil 9-sentabr kuni viloyat prokurori o‘rinbosari Baxtiyor Xudoyberdiyev ishtirokidagi yoshlar hamda “temir daftar”ga kiritilgan aholi bandligini ta’minlash va ularga ijtimoiy yordam ko‘rsatish maqsadida o‘tkazilgan uchrashuvda ko‘rinish bergan.

Shahar hokimi salomatligini tiklash maqsadida uch kundan ortiq muddat davomida o‘z uyida davolangan. 2020-yil 14-sentabrdan boshlab esa, u Respublika ixtisoslashtirilgan kardiologiya ilmiy-amaliy tibbiyot markazi Andijon filialida pnevmoniya kasalligidan davolanishni boshlagan. Tibbiyot xodimlarining qayd etishicha, unda koronavirus alomatlari topilmagan.

Musaxon Mamadaliyev 1971-yil 29-martda Andijon viloyati Shahrixon tumanida tug‘ilgan. Toshkent politexnika institutini (1994-yil), Toshkent moliya institutini (2003-yil), Prezident huzuridagi Davlat boshqaruvi akademiyasini tugatgan (2009-yil).

Eslatib o‘tamiz, 31-iyul kuni Qoraqalpog‘iston Jo‘qorg‘i Kengesi raisi, O‘zbekiston Qahramoni, senator Musa Yerniyazov koronavirus infeksiyasi asoratlaridan vafot etgan edi. Koronavirusga chalingan Buxoro viloyati hokimi vazifasini bajaruvchi Karim Kamolov 22-avgust kuni vafot etgandi. Qashqadaryo viloyatining Mirishkor tumani hokimi G‘ayrat Begaliyev 8-sentabr kuni koronavirus asoratlari oqibatida vafot etgandi. Iyul oyida esa Qoraqalpog‘iston Respublikasi Qonliko‘l tumani hokimi Daulet Tolibayev koronavirus bilan kasallanib, vafot etgandi.