Kuzning salqin kunlarida Farg‘ona vodiysi koronavirus o‘chog‘iga aylandi. Darvoqe, Farg‘onaga oid kattakon bir yangilikni ham dayjestimizga qo‘shdik, chunki bu yangilik butun respublikaga daxldordir.
Farg‘ona viloyatini sakkiz yildan beri boshqarib kelgan, turli audioyozuvlari, qiziqqon fe’li bilan internetda tanilgan hokim Shuhrat G‘aniyev lavozimni topshirdi. U O‘zbekiston bosh vazirining agrar va oziq-ovqat sohalarini rivojlantirish masalalari bo‘yicha o‘rinbosari lavozimida ish boshladi. Bu lavozimning avvalgi egasi O‘ktam Barnoyev yaqinda dunyodan o‘tgan edi.
Namangan viloyatini besh yildan beri boshqarib kelgan Xayrulla Bozorov Farg‘ona viloyati hokimligini qabul qilib oldi. O‘zbekiston Ekologiya va atrof-muhitni muhofaza qilish davlat qo‘mitasi raisi lavozimida ishlab kelgan Shavkatjon Abdurazzoqov Namangan viloyati hokimi bo‘ldi.
Xayrulla Bozorov Farg‘onaga tayinlanishi bilanoq Farg‘ona va Andijon viloyatlarini bog‘lovchi Quva—Asaka yo‘lidagi blokpostlar olib tashlandi.
* * *
Bugun koronavirus kirib bormagan mahalla qolmadi, desak bo‘ladi. Xususan, respublikaning eng aholi zich yashovchi mintaqasi Farg‘ona vodiysi virus o‘chog‘iga aylandi. Ushbu dayjestni o‘qiyotganlarning hech bo‘lmaganda bir tanishi koronavirusni yuqtirgan.
Bu hafta Mahalla va oilani qo‘llab-quvvatlash vaziri Rahmat Mamatov va uning o‘rinbosarlari Botir Parpiyev hamda Azizbek Ikromovda koronavirus infeksiyasi aniqlandi. Oldinroq vazirning birinchi o‘rinbosari ham koronavirusdan davolangan.
Sog‘liqni saqlash vazirligi koronavirus infeksiyasi asoratlaridan vafot etganlar yashagan joy, marhumlarning initsial hamda yoshini e’lon qilishni to‘xtatdi. Endi faqat vafot etganlar soni va jinsi haqida ma’lumot beriladi.
Budjet xarajatlari 1,9 trillion so‘mga qisqartirildi. Ushbu mablag‘ Inqirozga qarshi kurashish jamg‘armasiga o‘tkaziladi va koronavirus pandemiyasiga qarshi kurashishga sarflanadi, deb yozmoqda @davletovuz Telegram-kanali.
Avvalroq ommaviy axborot vositalarida Rossiya O‘zbekistonga 35 million dozagacha “Sputnik V” nomli koronavirusga qarshi vaksina jo‘natishi bo‘yicha kelishib olinibdi, degan xabarlar tarqagan edi. Rossiya vaksinasiga ko‘pchilik umid bilan ko‘z tikayotgani sir emas. Ammo bu gaplar noto‘g‘ri bo‘lib chiqdi. O‘zbekiston ikki davlat, ya’ni Xitoy va Rossiya farmatsevtika kompaniyalari bilan muzokaralar o‘tkazgan. Jumladan, Rossiyada ishlab chiqarilayotgan “Sputnik-V” vaksinasining 5 ming dozasini O‘zbekistonga ajratish yuzasidan murojaat qilingan xolos.
Taniqli suxandon va xonanda, O‘zbekistonda xizmat ko‘rsatgan artist Shuhrat Qayumov dunyodan o‘tdi. 51 yoshli diktorning bevaqt o‘limi sababi aytilmadi, biroq hamkasblaridan birining yozishicha unda avvaldan pnevmoniya va saraton bo‘lgan ekan.
Shuningdek, bu hafta O‘zbekistonning birinchi va so‘nggi davlat kotibi Rahim Rajabov 83 yoshida vafot etdi.
* * *
O‘zbekiston Prezidenti Shavkat Mirziyoyev Birlashgan Millatlar Tashkiloti Bosh Assambleyasining onlayn formatda o‘tayotgan 75-sessiyasida nutq so‘zladi.
O‘zbekiston prezidenti nutqida kambag‘allikni kamaytirish, jahonning barcha mamlakatlari bilan sheriklikni rivojlantirish, koronavirus pandemiyasi, jamiyatni modernizatsiyalash, gender tengligi, yoshlar huquqlari, afg‘on muammosi, Orolbo‘yi falokati kabi masalalarni tilga oldi.
Prezident birinchi marta BMTning onlayn minbarida o‘zbek tilida so‘zlagani ko‘pchilik tomonidan o‘zbek tilining mavqei ko‘tarilishi deb baholandi. Xususan, Afg‘oniston vitse-prezidenti Abdulrashid Do‘stum “men bundan shaxsan o‘zim o‘zbek o‘g‘loni va afg‘onistonlik o‘zbeklarning rahbari sifatida faxrlanaman. Bu biz uchun yuksak iftixordir”, dedi.
* * *
Ma’lumki, avtomobil raqamlari va pasport bizda tez-tez almashib turishi odat tusiga aylandi. Yangilik shuki, O‘zbekiston fuqarosining 2011-yilgi namunadagi biometrik pasporti 2030-yil 1-yanvardan boshlab haqiqiy emas deb hisoblanadi. Ungacha esa biometrik pasport o‘rniga ID-kartalar joriy etiladi. ID-karta quyidagi muddatlarga beriladi:
- yangi tug‘ilgan bolaga bir yoshgacha – 2 yil muddatga;
- bir yoshdan 16 yoshgacha – 5 yil muddatga;
- 16 yoshdan boshlab – 10 yil muddatga.
ID-kartani rasmiylashtirish uchun bazaviy hisoblash miqdorining 89 foizi, ya’ni 198 ming 470 so‘m (22.09.2020 holatiga) miqdorida to‘lov undiriladi. ID-kartalarni olish va almashtirish uchun xohlagan ichki ishlar organlarining migratsiya va fuqarolikni rasmiylashtirish bo‘linmalariga murojaat qilish mumkin.
Hozircha dayjestimizdan o‘rin olgan yangiliklarimiz shular. “Daryo”da qoling va eng so‘nggi yangiliklardan xabardor bo‘ling. Karantin talablariga rioya qiling.
Izoh (0)