Кузнинг салқин кунларида Фарғона водийси коронавирус ўчоғига айланди. Дарвоқе, Фарғонага оид каттакон бир янгиликни ҳам дайжестимизга қўшдик, чунки бу янгилик бутун республикага дахлдордир.
Фарғона вилоятини саккиз йилдан бери бошқариб келган, турли аудиоёзувлари, қизиққон феъли билан интернетда танилган ҳоким Шуҳрат Ғаниев лавозимни топширди. У Ўзбекистон бош вазирининг аграр ва озиқ-овқат соҳаларини ривожлантириш масалалари бўйича ўринбосари лавозимида иш бошлади. Бу лавозимнинг аввалги эгаси Ўктам Барноев яқинда дунёдан ўтган эди.
Наманган вилоятини беш йилдан бери бошқариб келган Хайрулла Бозоров Фарғона вилояти ҳокимлигини қабул қилиб олди. Ўзбекистон Экология ва атроф-муҳитни муҳофаза қилиш давлат қўмитаси раиси лавозимида ишлаб келган Шавкатжон Абдураззоқов Наманган вилояти ҳокими бўлди.
Хайрулла Бозоров Фарғонага тайинланиши биланоқ Фарғона ва Андижон вилоятларини боғловчи Қува—Асака йўлидаги блокпостлар олиб ташланди.
* * *
Бугун коронавирус кириб бормаган маҳалла қолмади, десак бўлади. Хусусан, республиканинг энг аҳоли зич яшовчи минтақаси Фарғона водийси вирус ўчоғига айланди. Ушбу дайжестни ўқиётганларнинг ҳеч бўлмаганда бир таниши коронавирусни юқтирган.
Бу ҳафта Маҳалла ва оилани қўллаб-қувватлаш вазири Раҳмат Маматов ва унинг ўринбосарлари Ботир Парпиев ҳамда Азизбек Икромовда коронавирус инфекцияси аниқланди. Олдинроқ вазирнинг биринчи ўринбосари ҳам коронавирусдан даволанган.
Соғлиқни сақлаш вазирлиги коронавирус инфекцияси асоратларидан вафот этганлар яшаган жой, марҳумларнинг инициал ҳамда ёшини эълон қилишни тўхтатди. Энди фақат вафот этганлар сони ва жинси ҳақида маълумот берилади.
Бюджет харажатлари 1,9 триллион сўмга қисқартирилди. Ушбу маблағ Инқирозга қарши курашиш жамғармасига ўтказилади ва коронавирус пандемиясига қарши курашишга сарфланади, деб ёзмоқда @davletovuz Telegram-канали.
Аввалроқ оммавий ахборот воситаларида Россия Ўзбекистонга 35 миллион дозагача «Спутник V» номли коронавирусга қарши вакцина жўнатиши бўйича келишиб олинибди, деган хабарлар тарқаган эди. Россия вакцинасига кўпчилик умид билан кўз тикаётгани сир эмас. Аммо бу гаплар нотўғри бўлиб чиқди. Ўзбекистон икки давлат, яъни Хитой ва Россия фармацевтика компаниялари билан музокаралар ўтказган. Жумладан, Россияда ишлаб чиқарилаётган «Спутник-V» вакцинасининг 5 минг дозасини Ўзбекистонга ажратиш юзасидан мурожаат қилинган холос.
Таниқли сухандон ва хонанда, Ўзбекистонда хизмат кўрсатган артист Шуҳрат Қаюмов дунёдан ўтди. 51 ёшли дикторнинг бевақт ўлими сабаби айтилмади, бироқ ҳамкасбларидан бирининг ёзишича унда аввалдан пневмония ва саратон бўлган экан.
Шунингдек, бу ҳафта Ўзбекистоннинг биринчи ва сўнгги давлат котиби Раҳим Ражабов 83 ёшида вафот этди.
* * *
Ўзбекистон Президенти Шавкат Мирзиёев Бирлашган Миллатлар Ташкилоти Бош Ассамблеясининг онлайн форматда ўтаётган 75-сессиясида нутқ сўзлади.
Ўзбекистон президенти нутқида камбағалликни камайтириш, жаҳоннинг барча мамлакатлари билан шерикликни ривожлантириш, коронавирус пандемияси, жамиятни модернизациялаш, гендер тенглиги, ёшлар ҳуқуқлари, афғон муаммоси, Оролбўйи фалокати каби масалаларни тилга олди.
Президент биринчи марта БМТнинг онлайн минбарида ўзбек тилида сўзлагани кўпчилик томонидан ўзбек тилининг мавқеи кўтарилиши деб баҳоланди. Хусусан, Афғонистон вице-президенти Абдулрашид Дўстум «мен бундан шахсан ўзим ўзбек ўғлони ва афғонистонлик ўзбекларнинг раҳбари сифатида фахрланаман. Бу биз учун юксак ифтихордир», деди.
* * *
Маълумки, автомобиль рақамлари ва паспорт бизда тез-тез алмашиб туриши одат тусига айланди. Янгилик шуки, Ўзбекистон фуқаросининг 2011 йилги намунадаги биометрик паспорти 2030 йил 1 январдан бошлаб ҳақиқий эмас деб ҳисобланади. Унгача эса биометрик паспорт ўрнига ИД-карталар жорий этилади. ИД-карта қуйидаги муддатларга берилади:
- янги туғилган болага бир ёшгача – 2 йил муддатга;
- бир ёшдан 16 ёшгача – 5 йил муддатга;
- 16 ёшдан бошлаб – 10 йил муддатга.
ИД-картани расмийлаштириш учун базавий ҳисоблаш миқдорининг 89 фоизи, яъни 198 минг 470 сўм (22.09.2020 ҳолатига) миқдорида тўлов ундирилади. ИД-карталарни олиш ва алмаштириш учун хоҳлаган ички ишлар органларининг миграция ва фуқароликни расмийлаштириш бўлинмаларига мурожаат қилиш мумкин.
Ҳозирча дайжестимиздан ўрин олган янгиликларимиз шулар. «Дарё»да қолинг ва энг сўнгги янгиликлардан хабардор бўлинг. Карантин талабларига риоя қилинг.
Изоҳ (0)