Bentley markasining 100 yillik yubileyi munosabati bilan cheklangan seriyada taqdim etilgan Blower modellari ortidan kompaniya ishqibozlaridan biri Lego konstruktori yordamida afsonaviy modelning nusxasini yaratdi. Erkak poyga avtomobilning mitti nusxasi uchun bir yarim yil vaqt sarflagan, deb yozadi Motor.
Daniya kompaniyasi Bentley Blower uchun rasmiy jamlanmani hali taqdim etmagan bo‘lsa-da, tashabbuskor erkak o‘yinchoq modelni Lego Technic lineykasi yordamida yaratgan. Muallifning so‘zlariga ko‘ra, loyiha Lego Ideas platformasida 10 ming obunachi yig‘sa, kompaniya konstruktorning original jamlanmasini ishlab chiqarish imkoniyatini ko‘rib chiqadi. Ayni vaqtda o‘yinchoq Blower’ning folloverlari 6100 kishiga yetgan.
Bentley Blower’ning o‘yinchoq nusxasidan rul mexanizmi ham o‘rin olgan bo‘lib, u original avtomobilning tizimiga juda o‘xshash. Modelning orqa differensiali o‘yinchoq dvigatel bilan shunday bog‘langanki, mashina oldinga itarilganida motorning tirsaksimon vali aylanadi.
Loyiha muallifining aytishicha, u mazkur noyob modelni yaratish ustida 2018-yili ish boshlagan. Entuziast 18 oy davomida afsonaviy sport avtomobilining aniq nusxasini yaratish bilan shug‘ullangan.
Eslatib o‘tamiz, iyun oyida Honda markasi Lego kompaniyasi mutaxassislari bilan birga konstruktor yordamida Avstraliyadagi dunyoga mashhur Mount Panorama poyga trassasini yaratgan edi.
Mavzuga doir: Lego’ning Chevrolet Corvette ZR1 o‘yinchog‘i elektromotor va uzatmalar qutisi bilan jihozlandi (video)
Izoh (0)