O‘zbekistonda 2020-yilning 14-sentabr kunidan boshlab maktab o‘quvchilari uchun televizion darslar uzatila boshlandi. Teledarslar davomida o‘qituvchilarning xatoga yo‘l qo‘yish holatlari kuzatilmoqda. Xalq ta’lim vazirligi ushbu holatlar yuzasidan munosabat bildirdi.
“‘Onlayn-maktab’ loyihasi doirasida har kuni 100 dan ortiq (30–35 soat) dars tasvirga olinmoqda. Mazkur darslarda imkon qadar xatolik o‘tmasligiga harakat qilinmoqda.
Biroq 16-sentabr kuni efirga uzatilgan chet tili fani videodarsida ayrim xatoliklarga yo‘l qo‘yildi. Eng avvalo mazkur holat uchun barchadan uzr so‘ramoqchimiz.
Xalq ta’limi vazirligi tomonidan darslarda yo‘l qo‘yilgan xato va kamchiliklarni bartaraf etish maqsadida chet tili o‘qituvchilarining tarkibi qayta ko‘rib chiqildi, dars muharriri almashtirildi hamda darslarda tajribali o‘qituvchilar jamoasini yanada kengaytirish maqsadida mahoratli pedagoglar uchun tanlov e’lon qilindi.
Keng jamoatchilik va ijtimoiy tarmoq faollaridan ‘Onlayn-maktab’ loyihasida ishtirok etayotgan o‘qituvchilarni kamsitmaslikni so‘ramoqchimiz. Har birimiz xatolikka yo‘l qo‘yishimiz mumkin, ish bor joyda xatoliklar ham uchrab turadi. Lekin bu xatoliklarning oldini olish va kelgusida yo‘l qo‘ymaslik choralari ko‘rilmoqda.
Umid qilamizki, bu vaziyat barchani o‘z vazifalarini bajarishda e’tiborliroq bo‘lishga va ishga professional yondashishga undaydi”, – deyiladi vazirlik xabarida.
Shuningdek, vazirlik, hozirgi sharoitda o‘z sog‘lig‘ini xavf ostiga qo‘yib ham an’anaviy, ham masofaviy shaklda faoliyat olib borayotgan hamda videodarslarni tasvirga olish jarayonlariga jalb qilingan o‘qituvchilarga minnatdorlik bildirgan.
Avvalroq Toshkentda 21-sentabrdan qaysi maktablar an’anaviy tarzda faoliyat boshlashi ma’lum qilingandi.
Izoh (0)