Qanday belgilar koronavirus bemorlarini statsionarga yuborish zaruratini bildirishi aytildi

Chidab bo‘lmaydigan og‘riqlar, jumladan, bosh og‘riqlari, to‘xtamasdan qayt qilish, va intensiv diareya ham koronavirus bemorlarini statsionar sharoitda shifoxonada davolashga ko‘rsatma sanaladi. Bu haqda Koronavirusga qarshi kurash shtabi a’zosi Habibullo Oqilov AOKA zalida tashkil etilgan brifingda ma’lum qilgan.

• hansirash (havo yetmayotganligini sezish) — nafas olish chastotasi bemorning tinch holatida daqiqasiga 22 va undan yuqori bo‘lishi;
• tana harorati barqaror ravishda 39 daraja va undan yuqori, issiqni tushiruvchi dori vositalari yordamida tushmasligi;
• qonning kislorod bilan ta’minlanish foizi 90 foizdan past bo‘lishi (bu ko‘rsatkich pulsoksimetr yordamida aniqlanadi);
• qon bosimining tushib yoki keskin ko‘tarilib ketishi (90 dan past yoki 220 dan yuqori);
• yurak urishining tezlashishi — puls daqiqasiga 130 va undan yuqori bo‘lishi;
• bemorda ong ko‘rsatkichlarining pasayishi;
• qo‘shimcha xavf omillari: yoshi 60 va undan yuqori, yondosh kasalliklar — diabet, gipertoniya, yurak xastaliklari, o‘pka va buyraklar surunkali kasalliklari, onkologik kasalliklar va immunitetning pasayishi;
• og‘ir simptomlarning mavjudligi: ya’ni chidab bo‘lmaydigan og‘riqlar, jumladan, bosh og‘riqlari, to‘xtamasdan qayt qilish, va intensiv diareya.

Eslatib o‘tamiz, avvalroq Koronavirusga qarshi kurashish shtabining yana bir a’zosi Nargiza Nurullayeva koronavirusning eng ko‘p uchraydigan belgilarini foizlar nisbatida ma’lum qilgan, virusning boshqa shamollash va o‘tkir respirator kasalliklardan farqli bo‘lgan jihatlari, eng erta paydo bo‘ladigan alomati aytilgan edi.