Sardoba va Buxorodagi falokatlar oqibatlarini bartaraf etish uchun budjetdan qancha mablag‘ ajratilgani ma’lum qilindi

Moliya vaziri Timur Ishmetov Davlat budjetining 2020-yilning 1-yarim yilligidagi ijrosi yuzasidan Oliy Majlis Qonunchilik palatasi yalpi majlisida ma’ruza qildi. Bu haqda vazirlik xabar bermoqda.

Maruzada ta’kidlanishicha, 2020-yilning 27—28-aprel kunlari kuchli shamol ta’sirida Buxoro viloyatida zarar ko‘rgan aholi va iqtisodiy-infratuzilma obyektlariga 164 milliard so‘m ajratilgan.

Shuningdek, Sardoba suv ombori to‘g‘onida yuzaga kelgan favqulodda hodisa oqibatida jabrlangan aholini qo‘llab-quvvatlash va infratuzilmani tiklash xarajatlariga jami 1,5 trillion so‘m qo‘shimcha mablag‘ ajratish belgilangan. Shundan 2020-yilning 1-yarim yilligida 500 milliard so‘m yo‘naltirilgan.

Avvalroq Sardobadagi suv toshqinidan zarar ko‘rgan uylarni ta’mirlashga salkam 30 milliard so‘m sarflangani ma’lum qilingandi.