O‘zbekistonda xavfsiz, tartibli, qonuniy mehnat migratsiyasini nazarda tutuvchi yangi tizim yaratilmoqda. Uning yo‘nalishlariga kiruvchi ishlarni amalga oshirish uchun jami 300 milliard so‘m mablag‘ ajratilgan.
Bu haqda Bandlik va mehnat munosabatlari vazirining birinchi o‘rinbosari Erkin Muhitdinov Xalqaro press-klubning navbatdagi sessiyasida ma’lum qildi.
Yangi tizim quyidagi yo‘nalishlarni nazarda tutadi:
- Xorijga ketishdan avval fuqaroni kasb va tilga tayyorlab borish. Bu bo‘yicha katta tizim yaratilmoqda, 200 ga yaqin kasb-hunar markazlari shu tizimga xizmat qiladi. Fuqarolarni 20 dan ortiq kasbga va xorijiy tilga o‘qitadi;
- Migrantning xorijga ketish xarajatlarini imtiyozli ravishda moliyalashtirish dasturi kengaytiriladi. Sug‘urta polisi, kredit soni kengaytiriladi;
- Fuqarolar bilan xorijda ham aloqani saqlab turish. Tashqi mehnat migratsiyasi agentligi vakolatxona tizimi kengaymoqda. Ular tomonidan migrantlarga huquqiy, moddiy-ijtimoiy yordam tizimi kengayadi. Buning uchun o‘sha davlatlardagi huquqiy tashkilotlari, advokatlik kompaniyalari ichida tanlov amalga oshiriladi Tanlov g‘olibi shartnoma bo‘yicha fuqarolarning huquqlarini himoya qilishi ko‘zda tutiladi. Ularning gonorari Xorijdagi fuqarolarni himoya qilish jamg‘armasi tomonidan to‘lanadi.
- Migrantlarning qaytib kelganidan keyin mahalliy mehnat bozoriga reintegratsiya qilish, bandligini ta’minlash. 2020-yilning o‘zida 100 mingga yaqin migrantlar bandligi ta’minlangan. Yil oxirigacha 110 ming nafarini ta’minlash ko‘zda tutilgan. Bular bo‘sh vakansiyalar, vaqtinchalik jamoat ishlari, tadbirkorlikka jalb qilish dasturi asosida, o‘z-o‘zini band qilish, yana ketish istagi bo‘lgan fuqarolarni kasbga o‘qitib xorijiy migratsiyaga yuborish va hokazo.
Shuningdek, fuqarolarni nafaqat O‘zbekiston, balki xorijda ham kasb-hunarga o‘qitish rejasi bor. Rossiyaning 5 ta yirik shahridagi 53 ta kasb-hunar kolleji bilan kelishgan holda kasbiy, rus tili bo‘yicha bilimi yetmagan taqdirda Rossiya va “World Skills” uyushmasi metodikasi Rossiya Xalqlar do‘stligi universiteti bilan hamkorlikda rus tili bo‘yicha o‘qitiladi.
Shuningdek, vazir o‘rinbosari hozirgi vaqtda O‘zbekistonning har bir hududida kassalar ochilib, aviachiptalar va temiryo‘l chiptalari mehnat migrantlariga imtiyozli sotilayotgani, avtobuslar yo‘lga qo‘yilgani, 200 mingga yaqin fuqaroga xizmat qilinib, 70 mingta sug‘urta polisi berilganini qo‘shimcha qildi. 2019-yildan boshlab mazkur polislar bepul berilmoqda. Yo‘lga bog‘liq xarajatlarni qoplash uchun imtiyozli kredit ham berilishni boshlangani ta’kidlandi.
Izoh (0)