Mehriddin Xayriddinov bosh vazir maslahatchisi — Xorijda vaqtinchalik mehnat faoliyatini amalga oshirayotgan O‘zbekiston fuqarolari huquqlarini himoya qilish va qo‘llab-quvvatlash masalalari departamenti mudiri lavozimiga tayinlandi. Bu haqda bosh vazir matbuot xizmatiga tayanib “Gazeta.uz” xabar berdi.
Mehriddin Xayriddinov 1977-yilda Buxoro viloyatida tug‘ilgan. U 1999-yilda Jahon iqtisodiyoti va diplomatiyasi universitetini tamomlagan. G‘ijduvon tumanidagi 46-maktabda 2000—2001-yillarda o‘qituvchi bo‘lib ishlagan. 2001—2008-yillarda Mehriddin Xayriddinov Navoiy kon-metallurgiya kombinatida 1, 2, 3-toifa muhandisi, tashqi iqtisodiy aloqalar bo‘limi boshlig‘i o‘rinbosari lavozimlarida mehnat qilgan.
Mehriddin Xayriddinov Tashqi iqtisodiy aloqalar, investitsiyalar va savdo vazirligida 2008—2010-yillarda yetakchi mutaxassis, 2010—2014-yillarda O‘zbekistonning Qirg‘izistondagi elchixonasining 1-kotibi, 2014—2017-yillarda O‘zbekiston Tashqi ishlar vazirligining Konsullik boshqarmasi boshlig‘i lavozimlarida ishlagan, so‘ngra 2017—2018-yillarda O‘zbekistonning Sankt-Peterburg shahridagi bosh konsuli bo‘lgan.
Bosh vazirning tashqi mehnat migratsiyasi masalalari bo‘yicha maslahatchisi lavozimi Prezidentning 2019-yil 20-avgustdagi chet elda ishlayotgan O‘zbekiston fuqarolari va ularning oilalarini himoya qilish kafolatlarini kuchaytirish to‘g‘risidagi farmoni bilan Vazirlar Mahkamasining ijro etuvchi tuzilmasiga kiritilgan.
Eslatib o‘tamiz, O‘zbekiston Prezidenti Shavkat Mirziyoyev raisligida 17-avgust, dushanba kuni xorijda mehnat qilayotgan fuqarolarga munosib shart-sharoitlar yaratish va ular bilan tizimli ishlash yuzasidan videoselektor yig‘ilishi o‘tkazildi. Yig‘ilishda xorijiy mehnat migratsiyasini qo‘llab-quvvatlash uchun yangi tizim yaratilishi ma’lum qilindi.
Izoh (0)