Меҳриддин Хайриддинов бош вазирнинг ташқи меҳнат миграцияси бўйича маслаҳатчиси этиб тайинланди

Меҳриддин Хайриддинов бош вазир маслаҳатчиси — Хорижда вақтинчалик меҳнат фаолиятини амалга ошираётган Ўзбекистон фуқаролари ҳуқуқларини ҳимоя қилиш ва қўллаб-қувватлаш масалалари департаменти мудири лавозимига тайинланди. Бу ҳақда бош вазир матбуот хизматига таяниб «Gazeta.uz» хабар берди.

Меҳриддин Хайриддинов 1977 йилда Бухоро вилоятида туғилган. У 1999 йилда Жаҳон иқтисодиёти ва дипломатияси университетини тамомлаган. Ғиждувон туманидаги 46-мактабда 2000—2001 йилларда ўқитувчи бўлиб ишлаган. 2001—2008 йилларда Меҳриддин Хайриддинов Навоий кон-металлургия комбинатида 1, 2, 3-тоифа муҳандиси, ташқи иқтисодий алоқалар бўлими бошлиғи ўринбосари лавозимларида меҳнат қилган.

Меҳриддин Хайриддинов Ташқи иқтисодий алоқалар, инвестициялар ва савдо вазирлигида 2008—2010 йилларда етакчи мутахассис, 2010—2014 йилларда Ўзбекистоннинг Қирғизистондаги элчихонасининг 1-котиби, 2014—2017 йилларда Ўзбекистон Ташқи ишлар вазирлигининг Консуллик бошқармаси бошлиғи лавозимларида ишлаган, сўнгра 2017—2018 йилларда Ўзбекистоннинг Санкт-Петербург шаҳридаги бош консули бўлган.

Бош вазирнинг ташқи меҳнат миграцияси масалалари бўйича маслаҳатчиси лавозими Президентнинг 2019 йил 20 августдаги чет элда ишлаётган Ўзбекистон фуқаролари ва уларнинг оилаларини ҳимоя қилиш кафолатларини кучайтириш тўғрисидаги фармони билан Вазирлар Маҳкамасининг ижро этувчи тузилмасига киритилган.

Эслатиб ўтамиз, Ўзбекистон Президенти Шавкат Мирзиёев раислигида 17 август, душанба куни хорижда меҳнат қилаётган фуқароларга муносиб шарт-шароитлар яратиш ва улар билан тизимли ишлаш юзасидан видеоселектор йиғилиши ўтказилди. Йиғилишда хорижий меҳнат миграциясини қўллаб-қувватлаш учун янги тизим яратилиши маълум қилинди.