Buxoro tibbiyot institutining oliy hamshiralik ishi fakulteti bitiruvchisi 21 yoshli Nargiza Ostonova Peshku tuman tibbiyot birlashmasi boshlig‘i Avazbek Hojiyev qabuliga ish so‘rab bir necha marotaba borgan. Biroq TTB boshlig‘i uni eshitmay, qo‘pol muomalada bo‘lgan va “eshikni ko‘rsatib qo‘ygan”. Bu haqda “Daryo” muxbiri Laylo Hayitova xabar berdi.
“Har safar tuman tibbiyot birlashmasi boshlig‘ining eshigi oldiga borib, kutib-kutib ortga qaytganman. Hatto ertalabdan tushlik vaqti soat 13:00 gacha kutgan vaqtlarim bo‘lgan. Eshiklari ochiqligida mening to‘rt-besh soat kutganimni ko‘rgan bo‘lsa ham ‘nima maqsadda kelganding’ deb so‘ramagan. Lekin ish so‘rab borganimdan xabari bo‘lgan”, — deydi Nargiza Ostonova.
Tibbiyot institutining oliy hamshiralik ishi fakulteti bitiruvchisi Nargiza Ostonovaning “Daryo”ga bildirishicha, u har gal ish so‘rab borganda qo‘pol munosabatga duch kelavergach, audioyozuvni olishga majbur bo‘lgan.
“Daryo”ga taqdim etilgan audioyozuvdan anglashilishicha, bosh shifokor “O‘sha yerda turib, gapir! Chiq! Chiq ko‘chaga! Eshikdan chiq, dedim men senga! Ana shu yerdan turib gapir! Vrachmisan?! Vrach bo‘lsang kir, bo‘lmasa kirib o‘tirma xonamga. Chiq, tamom!”, deya baqirgan va boshqa xodimning ichkariga kirishini aytgan.
Avazbek Hojiyevning ish so‘rab borgan talabaga qilgan qo‘pol munosabati ijtimoiy tarmoqlarda chiqqach, keng muhokamalarga sabab bo‘lgan.
Peshku tuman tibbiyot birlashmasi rahbari Avazbek Hojiyev “Daryo” muxbiri bilan suhbatda audioyozuvdagi ovoz o‘ziga tegishli ekanini tan olgan. U ish izlab kelgan yosh mutaxassis bilan qo‘pol munosabatini tun-u kun bemorlar orasida yurgani, o‘zi va atrofidagilarning salomatligini himoyalashga mas’ulligi bilan izohlagan.
Tuman tibbiyot birlashmasi huquqshunosi Shuhrat Halimov talaba qizning ish so‘rab qilgan murojaatini qoralab, yoshlarning bandlik masalasini “ikkilamchi masala” deydi. Va ish so‘rab borgan talabani karantin qoidalariga zid harakat qilishda ayblaydi.
“Tibbiyot birlashmasi boshlig‘i pandemiyani jilovlash, kasallikning oldini olish, bemorlarga sifatli va malakali tibbiy xizmat ko‘rsatilishini tashkillashtirish bilan shug‘ullanayotganda uni boshqa ‘ikkilamchi masalalar’ bilan chalg‘itmaslik muhim. Ushbu fuqaro 2020-yil 1-avgust kuni komissiya qaroriga rioya etmasdan, tibbiyot birlashmasiga karantin qoidalariga zid ravishda ish so‘rab kelgan. Hurmatli ish izlab yurgan singlim, sizni tibbiyot xodimi sifatida sog‘liqni saqlash maydonidagi jangga partizan sifatida kirib, koronavirusni yanchib tashlashda jonbozlik ko‘rsatishga taklif qilamiz. Har qanday jamoada ishlash uchun jamoaning kamchiligini emas, yutuqlarini ko‘rsatib, yordam berib, natijaga erishish mumkin. Agar siz ishlashni xohlasangiz, karantin zonada hamshira sifatida ishlashingiz mumkin”, — deydi.
Mazkur masala viloyat hokimi o‘rinbosari e’tiborini ham tortgan.
“Rahbarning yoshlar taqdiriga befarq bo‘lishga haqi yo‘q. Vaholanki, ayni pandemiya davrida tibbiyot xodimlarining xizmati va ko‘magi juda zarur. Demak, ishga talabgor tibbiyot sohasi vakili bugun ishsiz qolmasligi shart. Har bir rahbar fuqaroga vaziyatni tushuntirishi, o‘z madaniyati va muomalasi bilan o‘rnak bo‘lishi shart. Do‘q-po‘pisa-yu, ‘eshikni ko‘rsatib qo‘yish’ payti o‘tgan. Bugun har bir rahbarning xatti-harakati, so‘zlashish madaniyati, xulq-atvori-yu, o‘zini tutishi jamoatchilik nazoratida ekanligini unutmasligi lozim”, — deydi Buxoro hokimi o‘rinbosari Mirali Hamroyev.
Qayd etish lozim, Prezident farmoniga ko‘ra O‘zbekistonda tibbiyot OTMlarining davlat granti asosida tahsil olgan bitiruvchilari 1 yilgacha bo‘lgan muddatga vaziyat og‘ir bo‘lgan hududlarga jalb qilinadi.
Aniqlanishicha, Peshku tuman tibbiyot birlashmasi rahbari yosh kadrning bir necha marotaba qabuliga ish so‘rab borganiga qaramasdan uni qabul qilmagan, bo‘sh ish o‘rni bor yoki yo‘qligini aytmagan. Shunda talaba audioyozuvni olishga va OAVga murojaat qilishga majbur bo‘lgan.
Ushbu murojaat Peshku tuman hokimi Amrillo Nazarov tomonidan o‘tkazilgan tezkor yig‘ilishda ham muhokama qilingan. Unda tibbiyot birlashmasida fuqaro murojaatlarini qabul qilish va murojaatlar bilan ishlash tizimli yo‘lga qo‘yilmagani tanqid qilingan. Shuningdek, Avazbek Hojiyevga ogohlantirish berilgan. Kelgusida yana shunday holat kuzatilsa, viloyat sog‘liqni saqlash boshqarmasiga taqdimnoma yuborilishi tushuntirilgan.
Ushbu holatlardan so‘ng talaba 5-avgust kuni TTBga ishga olingan. 2020-yil 6-avgustdan boshlab karantin zonasida 14 kun ishlagan hamshira buyruq chiqqan bo‘limda ish faoliyatini davom ettiradigan bo‘ldi.
Izoh (0)