Бухоро тиббиёт институтининг олий ҳамширалик иши факультети битирувчиси 21 ёшли Наргиза Остонова Пешку туман тиббиёт бирлашмаси бошлиғи Авазбек Ҳожиев қабулига иш сўраб бир неча маротаба борган. Бироқ ТТБ бошлиғи уни эшитмай, қўпол муомалада бўлган ва «эшикни кўрсатиб қўйган». Бу ҳақда «Дарё» мухбири Лайло Ҳайитова хабар берди.
«Ҳар сафар туман тиббиёт бирлашмаси бошлиғининг эшиги олдига бориб, кутиб-кутиб ортга қайтганман. Ҳатто эрталабдан тушлик вақти соат 13:00 гача кутган вақтларим бўлган. Эшиклари очиқлигида менинг тўрт-беш соат кутганимни кўрган бўлса ҳам ‘нима мақсадда келгандин’ деб сўрамаган. Лекин иш сўраб борганимдан хабари бўлган», — дейди Наргиза Остонова.
Тиббиёт институтининг олий ҳамширалик иши факультети битирувчиси Наргиза Остонованинг «Дарё»га билдиришича, у ҳар гал иш сўраб борганда қўпол муносабатга дуч келавергач, аудиоёзувни олишга мажбур бўлган.
«Дарё»га тақдим этилган аудиоёзувдан англашилишича, бош шифокор «Ўша ерда туриб, гапир! Чиқ! Чиқ кўчага! Эшикдан чиқ, дедим мен сенга! Ана шу ердан туриб гапир! Врачмисан?! Врач бўлсанг кир, бўлмаса кириб ўтирма хонамга. Чиқ, тамом!», дея бақирган ва бошқа ходимнинг ичкарига киришини айтган.
Авазбек Ҳожиевнинг иш сўраб борган талабага қилган қўпол муносабати ижтимоий тармоқларда чиққач, кенг муҳокамаларга сабаб бўлган.
Пешку туман тиббиёт бирлашмаси раҳбари Авазбек Ҳожиев «Дарё» мухбири билан суҳбатда аудиоёзувдаги овоз ўзига тегишли эканини тан олган. У иш излаб келган ёш мутахассис билан қўпол муносабатини тун-у кун беморлар орасида юргани, ўзи ва атрофидагиларнинг саломатлигини ҳимоялашга масъуллиги билан изоҳлаган.
Туман тиббиёт бирлашмаси ҳуқуқшуноси Шуҳрат Ҳалимов талаба қизнинг иш сўраб қилган мурожаатини қоралаб, ёшларнинг бандлик масаласини «иккиламчи масала» дейди. Ва иш сўраб борган талабани карантин қоидаларига зид ҳаракат қилишда айблайди.
«Тиббиёт бирлашмаси бошлиғи пандемияни жиловлаш, касалликнинг олдини олиш, беморларга сифатли ва малакали тиббий хизмат кўрсатилишини ташкиллаштириш билан шуғулланаётганда уни бошқа ‘иккиламчи масалалар’ билан чалғитмаслик муҳим. Ушбу фуқаро 2020 йил 1 август куни комиссия қарорига риоя этмасдан, тиббиёт бирлашмасига карантин қоидаларига зид равишда иш сўраб келган. Ҳурматли иш излаб юрган синглим, сизни тиббиёт ходими сифатида соғлиқни сақлаш майдонидаги жангга партизан сифатида кириб, коронавирусни янчиб ташлашда жонбозлик кўрсатишга таклиф қиламиз. Ҳар қандай жамоада ишлаш учун жамоанинг камчилигини эмас, ютуқларини кўрсатиб, ёрдам бериб, натижага эришиш мумкин. Агар сиз ишлашни хоҳласангиз, карантин зонада ҳамшира сифатида ишлашингиз мумкин», — дейди.
Мазкур масала вилоят ҳокими ўринбосари эътиборини ҳам тортган.
«Раҳбарнинг ёшлар тақдирига бефарқ бўлишга ҳақи йўқ. Ваҳоланки, айни пандемия даврида тиббиёт ходимларининг хизмати ва кўмаги жуда зарур. Демак, ишга талабгор тиббиёт соҳаси вакили бугун ишсиз қолмаслиги шарт. Ҳар бир раҳбар фуқарога вазиятни тушунтириши, ўз маданияти ва муомаласи билан ўрнак бўлиши шарт. Дўқ-пўписа-ю, ‘эшикни кўрсатиб қўйиш’ пайти ўтган. Бугун ҳар бир раҳбарнинг хатти-ҳаракати, сўзлашиш маданияти, хулқ-атвори-ю, ўзини тутиши жамоатчилик назоратида эканлигини унутмаслиги лозим», — дейди Бухоро ҳокими ўринбосари Мирали Ҳамроев.
Қайд этиш лозим, Президент фармонига кўра Ўзбекистонда тиббиёт ОТМларининг давлат гранти асосида таҳсил олган битирувчилари 1 йилгача бўлган муддатга вазият оғир бўлган ҳудудларга жалб қилинади.
Аниқланишича, Пешку туман тиббиёт бирлашмаси раҳбари ёш кадрнинг бир неча маротаба қабулига иш сўраб борганига қарамасдан уни қабул қилмаган, бўш иш ўрни бор ёки йўқлигини айтмаган. Шунда талаба аудиоёзувни олишга ва ОАВга мурожаат қилишга мажбур бўлган.
Ушбу мурожаат Пешку туман ҳокими Амрилло Назаров томонидан ўтказилган тезкор йиғилишда ҳам муҳокама қилинган. Унда тиббиёт бирлашмасида фуқаро мурожаатларини қабул қилиш ва мурожаатлар билан ишлаш тизимли йўлга қўйилмагани танқид қилинган. Шунингдек, Авазбек Ҳожиевга огоҳлантириш берилган. Келгусида яна шундай ҳолат кузатилса, вилоят соғлиқни сақлаш бошқармасига тақдимнома юборилиши тушунтирилган.
Ушбу ҳолатлардан сўнг талаба 5 август куни ТТБга ишга олинган. 2020 йил 6 августдан бошлаб карантин зонасида 14 кун ишлаган ҳамшира буйруқ чиққан бўлимда иш фаолиятини давом эттирадиган бўлди.
Изоҳ (0)