“Liverpul”dan Rossiyaning “Zenit” klubiga o‘tgan Deyan Lovren Sankt-Peterburgga yetib kelishi bilan sobiq jamoadoshi Muhammad Salohga qo‘ng‘iroq qildi.
Bu videosuhbatni “Zenit” matbuot xizmati e’lon qildi.
Lovren: “Eshit do‘stim, men bu yerga yetib keldim, aeroportda bir qator muxlislar kutib oldi, ularning orqasida esa ayiq turardi! Ha, ayiq. Aqlbovar qilmaydi, og‘ayni! Men so‘radim: ‘Kimdir hayvonot bog‘i eshigini ochib yubordimi?’. Ular menga shunday javob berdi: ‘Xavotir olma, u senga hech narsa qilmaydi. U odamlarga tegmaydi’ ”.
Saloh: “Tegmaydi? Ulardan biri bilan yashasang bo‘lar ekan!”.
Lovren: “Ha, endigina yetib keldim, jamoa bilan ertaga uchrashaman”.
Saloh: “U yerda sardor bo‘lasanmi?”.
Lovren: “Shuni xohlayapsanmi? Agar sen shuni istayotgan bo‘lsang, u holda harakat qilaman. Yangi soch turmaging ajoyib chiqibdi, menga yoqdi”.
Saloh: “Ha, o‘zimga ham ma’qul. Faqat juda qimmat”.
Lovren: “Qimmat?... Ha, shu sabab avvallari soching uzunmidi? Pulni tejash maqsadida oldirmasmiding? Aqlbovar qilmaydi”.
31 yoshli xorvatiyalik futbolchi “Zenit” bilan 3 yillik shartnoma imzoladi. Transfer narxi haqida rasmiy ma’lumot yo‘q. Ko‘plab manbalarga ko‘ra rus klubi transferga 8,5-12 million yevro atrofida pul sarflagan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)