Germaniya terma jamoasining sobiq futbolchisi Mixael Ballak og‘ir moliyaviy ahvolga tushib qolgan qadrdon klubi “Kemnitser”ga yordam berishga qaror qildi. Bu haqda klub matbuot xizmati xabar berdi.
“Kemnitser” Germaniyaning to‘rtinchi divizioniga tushib ketib, bankrot bo‘lish arafasida turibdi. Bundan xabar topgan Ballak o‘zining 40 ga yaqin “Bavariya”, “Chelsi”, “Bayer” va Germaniyada terma jamoasidagi asl formalarini kimoshdi savdosiga qo‘ydi. Har bir futbolkaning boshlang‘ich narxi ikki yuz yevrodan boshlanadi. Auksiondan tushgan barcha pullar klub hisobiga yo‘naltiriladi.
Avvaliga klubga 450 ming yevro zarurligi aytilgandi. Biroq keyinchalik klubdagilar 300 ming yevro yig‘ilganligini e’lon qildi.
Ma’lumot uchun, Ballak 12 yoshida “Kemnitser” klubi tizimiga kelgan. 1995-yilda esa klub safida professional futboldagi debyutini o‘tkazgan va ikki yil (1997-yilgacha) davomida jamoa sharafini himoya qilgan.
Mixael Ballakning “Chelsi” safidagi top-5 golni tomosha qiling (video)
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)