O‘zbekistonda respublika bo‘yicha qancha IVL, SIPAP apparatlari va kislorod konsentratorlari borligi ma’lum qilindi

Respublika bo‘yicha koronavirusni davolashga ixtisoslashtirilgan shifoxonalarda 942 ta IVL va 2 567 ta SIPAP apparatlari, shuningdek, 1 866 ta kislorod konsentratorlari mavjud. Bu haqda Koronavirusga qarshi kurashish shtab a’zosi Feruza Hamroboyeva AOKA huzuridagi shtabda tashkil etilgan brifingda ma’lum qilgan.

Eslatib o‘tamiz, avvalroq O‘zbekistonga Germaniyadan jami 3 tonnadan iborat kislorod ballonlari, tibbiy niqoblar, aravachalar, kombinezonlarni o‘z ichiga yuk, Singapurdan 30 ta kislorod konsentratori, Osiyo taraqqiyot bankidan 20 ta kislorod konsentratorlaridan iborat insonparvarlik yordamlari yuborilgan bo‘lsa, Xitoydan avvaliga 1300 ta, keyinroq 1000 ta kislorod konsentratori olib kelingan edi. Smartgov Consulting kompaniyasi ijrochi direktori, iqtisodchi Aziza Umarova esa o‘zining Telegram’dagi kanalida jamoatchilik e’tiborini kislorod konsentratorlari muammosiga qaratib, masalaga yechim izlagan.

Shuningdek, Hamroboyeva bugungi kunda koronavirus infeksiyasini aniqlash uchun testlar bilan ishlashda malakali mutaxassislarni qisqa fursatda tayyorlash masalasiga ham to‘xtalib o‘tgan. Jumladan, ayni paytda O‘zbekistonda tibbiyot xodimlarini kasbiy malakasini rivojlantirish markazi,  Toshkent tibbiyot akademiyasi, Andijon, Buxoro va Samarqand tibbiyot institutlari va ularning filiallarida umumiy klinik laborant shifokorlardan va Biologiya ta’lim yo‘nalishini tugatgan bitiruvchilardan virusologiya laboratoriyalarida faoliyat yurita oladigan mutaxassislarni tayyorlash ko‘zda tutilganini bildirdi.