Ўзбекистонда республика бўйича қанча ИВЛ, СИПАП аппаратлари ва кислород концентраторлари борлиги маълум қилинди

Республика бўйича коронавирусни даволашга ихтисослаштирилган шифохоналарда 942 та ИВЛ ва 2 567 та СИПАП аппаратлари, шунингдек, 1 866 та кислород концентраторлари мавжуд. Бу ҳақда Коронавирусга қарши курашиш штаб аъзоси Феруза Ҳамробоева АОКА ҳузуридаги штабда ташкил этилган брифингда маълум қилган.

Эслатиб ўтамиз, аввалроқ Ўзбекистонга Германиядан жами 3 тоннадан иборат кислород баллонлари, тиббий ниқоблар, аравачалар, комбинезонларни ўз ичига юк, Сингапурдан 30 та кислород концентратори, Осиё тараққиёт банкидан 20 та кислород концентраторларидан иборат инсонпарварлик ёрдамлари юборилган бўлса, Хитойдан аввалига 1300 та, кейинроқ 1000 та кислород концентратори олиб келинган эди. Smartgov Consulting компанияси ижрочи директори, иқтисодчи Азиза Умарова эса ўзининг Telegram’даги каналида жамоатчилик эътиборини кислород концентраторлари муаммосига қаратиб, масалага ечим излаган.

Шунингдек, Ҳамробоева бугунги кунда коронавирус инфекциясини аниқлаш учун тестлар билан ишлашда малакали мутахассисларни қисқа фурсатда тайёрлаш масаласига ҳам тўхталиб ўтган. Жумладан, айни пайтда Ўзбекистонда тиббиёт ходимларини касбий малакасини ривожлантириш маркази,  Тошкент тиббиёт академияси, Андижон, Бухоро ва Самарқанд тиббиёт институтлари ва уларнинг филиалларида умумий клиник лаборант шифокорлардан ва Биология таълим йўналишини тугатган битирувчилардан вирусология лабораторияларида фаолият юрита оладиган мутахассисларни тайёрлаш кўзда тутилганини билдирди.