AP: Rossiya razvedkasining 2 xodimi koronavirus haqida yolg‘on ma’lumotlar tarqatgan

Associated Press (AP) agentligi Rossiya razvedkasining ikki sobiq xodimi ingliz tilidagi saytlar orqali yolg‘on ma’lumot tarqatganini da’vo qilmoqda. Bu haqda “RBK” xabar qildi.

Agentlikning iddao qilishicha, Rossiya razvedka xizmati xodimlari yaqinlashib kelayotgan prezident saylovlari arafasida AQSh auditoriyasiga koronavirus haqida yolg‘on xabarlar tarqatmoqda. AP’ga bu haqda uning AQSh hukumatidagi ikki manbasi xabar qilgan.

Yolg‘on xabarlar ingliz tilidagi 3 ta saytda keltirib o‘tilgani aytilmoqda. Ta’kidlanishicha, saytlarda may oyining oxiri iyul oyi boshlari orasida 150 ta aholida vahima uyg‘otuvchi maqola chop etilgan. Hammasi koronavirus pandemiyasiga taalluqli bo‘lib, ularning ba’zilarida Rossiya qo‘llab-quvvatlangan bo‘lsa, boshqasida AQSh yomon otliq qilingan.

AP’ning ikki manbasiga ko‘ra, koronavirus haqida soxta ma’lumotlarni rus razvedkasining yuqori lavozimlarida ishlovchi ikki shaxs tarqatgan.

Shuningdek, agentlik manbalari Rossiyada ro‘yxatdan o‘tgan sayt haqida ham so‘z ochishgan. Ularning aytishicha bu saytdan pandemiya orqali g‘arbga qarshi kayfiyatni targ‘ib qilishda va yolg‘on ma’lumot tarqatishda foydalanilgan.

Yuqorida tilga olingan sayt InfoRos.ru bo‘lib, u o‘zidan tashqari, Infobrics.org va OneWorld.press veb-saytlarini boshqaradi, deb xabar beradi AP. Agentlik manbalariga ko‘ra, nashrlar ko‘pincha aksilamerika xarakterga ega va ma’lumotlarni uning asl manbasini yashirish hamda ma’lumotning qonuniyligini oshirish uchun boshqa saytlar orqali faol tarqatmoqda.

AP manbalarining ma’lumotiga ko‘ra InfoRos.ru saytining ikki menejeri Denis Tyurin va Aleksandr Starunskiy ilgari razvedkada ishlagan.

Nashrning yozishicha, saytlardagi soxta ma’lumotlarning tarqalishi va noyabr oyida bo‘lib o‘tadigan prezident saylovlari bevosita bog‘liq emas. Ammo ba’zi maqolalar Trampning raqibi demokrat Jo Baydenga tuhmat qilgan.

Shundan so‘ng, “RBK” nashri Rossiya Tashqi ishlar vazirligi axborot va matbuot departamentiga, Inforos.ru, Infobrics.org va Oneworld.press agentliklariga jurnalistik so‘rov yubordi.

InfoRos agentligi o‘zini Rossiyadagi siyosiy, iqtisodiy, ijtimoiy va madaniy hayotning ko‘plab dolzarb mavzulari va boshqa qator mavzularni yoritadigan ommaviy axborot vositasi sifatida tarifladi.

Veb-saytdagi ma’lumotlarga ko‘ra, agentlik asoschisi “IA ‘Inforos’” MChJ hisoblanadi. SPARK ma’lumotlar bazasida uning asosiy egasi Mixail Panin bo‘lib, u kompaniyaning 75 foiziga egalik qiladi. Andrey Ilyashenko kompaniyaning bosh direktori deb ko‘rsatilgan.

Bundan tashqari, 2008-yilda Denis Tyurin Inforos’ning 100 foiz aksiyasiga egalik qilgan va shundan keyin uning ulushi 66 foizga tushib ketgan. Endi u sheriklar ro‘yxatida yo‘q. InfoRos.ru’ning 2016-yilda nashr etilgan yozuvlaridan birida Tyurin, shuningdek, axborot agentligi bosh direktori sifatida ro‘yxatga olingan.

AQSh bundan oldin rasmiy Moskvani COVID-19 haqidagi yolg‘on ma’lumot tarqatish kampaniyasini olib borishda ayblagan. Fevral oyida rasmiy Vashington Twitter, Facebook va Instagram’dagi Rossiyaning soxta akkauntlari ushbu virus AQSh tomonidan ishlab chiqilgani va bu Markaziy razvedka boshqarmasining biologik quroli ekanligi haqidagi ma’lumotlarni tarqatganini ma’lum qilgan.

Shu bilan birga, Yevropa Ittifoqi Rossiya va Xitoy pandemiya haqida yolg‘on ma’lumot tarqatadigan kampaniyalarda ishtirok etayotganini ma’lum qildi. YeI ma’lumotlariga ko‘ra, bunday kampaniyalar, jumladan Yevropa mamlakatlarida ham o‘tkazildi.

Rossiya boshqa mamlakatlarning ishlariga aralashishni bir necha bor rad etgan. Tashqi ishlar vazirligi soxta narsalar tarqalishi haqidagi ma’lumotni “ataylab bo‘rttirish” deb atadi. Kreml Rossiyaning dezinformatsiya kampaniyasida ayblovlarni asossiz deb rad etdi.