Xitoyda shifokorlar Shensi provinsiyasida istiqomat qiluvchi fuqaroning uch kun urmagan yuragini qayta ishga tushirib yubordi. Tibbiyot xodimlari qonni kislorod bilan boyitish borasidagi usuldan foydalangani sabab qiz omon qolgan, deb yozadi Global Times.

Foto: Global Times

23 yoshli bemor shifoxonaga o‘tib ketgan shamollash sabab yuzaga kelgan fulminant miokard (o‘tkir yurak yetishmovchiligi shaklida tez rivojlanadigan yallig‘lanishli miokard shikastlanishining og‘ir shakli) bilan shifoxonaga yotqizilgan.

Miokardit kardiogen shokka olib kelgan va qizning yuragi urishdan to‘xtagan.

Tibbiyot xodimlari zudlik bilan qonni kislorod bilan boyitishning muqobil usulidan — ekstrakorporal membrana oksigenatsiyadan (EKMO) foydalangan. Bu bemorning nafas olishini ta’minlab, yurak faoliyatini qo‘llab-quvvatlagan.

Zamonaviy EKMO davolash usuli yordamida bemor hushida qolgan va atrofdagilar bilan yuragi urmasa ham gaplasha olgan.

“Bemor kutilganidan ham optimist bo‘lib chiqdi va do‘stlariga o‘zining g‘aroyib tajribasi haqida Wechat orqali xabarlar yubora boshladi”, — deydi klinika shifokorlaridan biri.