Rossiya, Ukraina va Misrda tahsil oluvchi o‘zbekistonlik talabalar avgust oyining birinchi o‘n kunligida o‘z vataniga qaytariladi, deya xabar beradi Transport vazirligi.
Qayd etilishicha, koronavirus pandemiyasi tufayli xorijiy davlatlar o‘rtasida transport qatnovlariga nisbatan qo‘yilgan cheklov choralari sabab chet davlatlar oliy o‘quv yurtlarida tahsil olayotgan o‘zbekistonlik talabalarni vatanga olib kelish va o‘z oilalari bag‘riga eson-omon yetkazish bo‘yicha tizimli ishlar amalga oshirilmoqda.
Vazirlik xabar berishicha, shu kunga qadar Moskva, Sankt-Peterburg, Novosibirsk, Tomsk, Minsk, Istanbul kabi shaharlardan talabalar olib kelindi.
Shuningdek, Respublika maxsus komissiyasi topshirig‘iga binoan avgust oyining birinchi o‘n kunligida Moskva, Sankt-Peterburg, Novosibirsk, Tomsk, Qozon, Rostov-Don, Kiyev, Qohira shaharlaridan maxsus charter reyslari orqali o‘zbekistonlik talabalarni olib kelish ishlarini tashkil etish masalasida xorijiy davlatlar aviatsiya ma’muriyatlari bilan ishlar olib borilayotgani ta’kidlandi.
Avvalroq Rossiyada o‘qiyotgan 200 ga yaqin o‘zbekistonlik talaba charter reys bilan Toshkentga olib kelingani, shundan so‘ng Qozondagi o‘zbekistonlik talabalar Shavkat Mirziyoyevga videomurojaat yo‘llagani haqida xabar berilgan edi.
Mavzuga doir:
- Alisher Qodirov koronavirusning yangi to‘lqini yuzaga kelmasligi uchun xorijdan o‘zbekistonliklarni olib kelishni to‘xtatish kerakligini aytdi
- Toshkent—Istanbul yo‘nalishi bo‘yicha qo‘shimcha reys amalga oshiriladi
- Xorijdagi o‘zbekistonliklarni evakuatsiya qilish bo‘yicha navbatdagi charter reyslar jadvali tasdiqlandi
Izoh (0)