Россия, Украина ва Мисрда таҳсил олувчи ўзбекистонлик талабалар август ойининг биринчи ўн кунлигида ўз ватанига қайтарилади, дея хабар беради Транспорт вазирлиги.
Қайд этилишича, коронавирус пандемияси туфайли хорижий давлатлар ўртасида транспорт қатновларига нисбатан қўйилган чеклов чоралари сабаб чет давлатлар олий ўқув юртларида таҳсил олаётган ўзбекистонлик талабаларни ватанга олиб келиш ва ўз оилалари бағрига эсон-омон етказиш бўйича тизимли ишлар амалга оширилмоқда.
Вазирлик хабар беришича, шу кунга қадар Москва, Санкт-Петербург, Новосибирск, Томск, Минск, Истанбул каби шаҳарлардан талабалар олиб келинди.
Шунингдек, Республика махсус комиссияси топшириғига биноан август ойининг биринчи ўн кунлигида Москва, Санкт-Петербург, Новосибирск, Томск, Қозон, Ростов-Дон, Киев, Қоҳира шаҳарларидан махсус чартер рейслари орқали ўзбекистонлик талабаларни олиб келиш ишларини ташкил этиш масаласида хорижий давлатлар авиация маъмуриятлари билан ишлар олиб борилаётгани таъкидланди.
Аввалроқ Россияда ўқиётган 200 га яқин ўзбекистонлик талаба чартер рейс билан Тошкентга олиб келингани, шундан сўнг Қозондаги ўзбекистонлик талабалар Шавкат Мирзиёевга видеомурожаат йўллагани ҳақида хабар берилган эди.
Мавзуга доир:
Изоҳ (0)