Suriya osmonida Isroil qiruvchi samolyoti Tehrondan Bayrutga uchgan Eronning Mahan Air aviakompaniyasiga qarashli yo‘lovchi layneriga xavf tug‘diradigan darajada yaqin kelgan. Bu haqda Eronning IRIB agentligiga asoslanib, Reuters xabar qilgan.
Agentlik ma’lumotiga ko‘ra, yo‘lovchi samolyotining uchuvchilari to‘qnashuvning oldini olish uchun yo‘nalishni keskin tarzda o‘zgartirgan. Ushbu manyovr sabab layner ichidagi bir necha yo‘lovchi jarohat olgan.
Keyinchalik Fars agentligi o‘z manbalariga tayanib, qiruvchi samolyotlar ikkita bo‘lgani va ular Isroil emas, balki AQShga tegishli ekanini xabar qildi. Livanning “Al-Mayaddin” telekanali ham ushbu axborotni tasdiqlagan.
Eron, AQSh va Isroil hukumatlari ushbu hodisa yuzasidan rasmiy izoh bermagan.
The Jerusalem Post nashrining yozishicha, Isroil va AQSh avval bir necha marta Mahan Air kompaniyasini Suriyadagi Eron homiylik qiladigan jangari guruhlarga qurol yetkazib berganlikda ayblagandi.
Izoh (0)