Mudofaa vazirligiga qarashli Zirhli texnikalarni ta’mirlash zavodining ishlab chiqarish bazasida T-64 rusumli tank kapital ta’mirdan o‘tkazildi va u zamonaviy talablar asosida modernizatsiya qilindi. Bu haqda Mudofaa sanoati davlat qo‘mitasi xabar berdi.
Ma’lumotlarga ko‘ra, T-64 tankining 5TDF dvigateli transmissiyasi bilan birgalikda “V” simon V-84 dvigatelga almashtirilib, uning quvvati 140 ot kuchiga oshirilgan va barcha tabiiy iqlim sharoitlarda harakatlanishi uchun moslashtirilgan.
Shuningdek, ekipaj shaxsiy tarkibi sog‘ligini asrash maqsadida tankning himoya qobig‘i qo‘shimcha zirh, panjara va dinamik himoya qutilari bilan kuchaytirilgan. Aloqa vositalari zamonaviy, ya’ni mamlakatda ishlab chiqarilayotgan Hytera brendi ostidagi raqamli radioaloqa vositalariga almashtirilgan. Ta’kidlanishicha, modernizatsiya qilingan T-64MV tanki buyurtmachi sinovidan muvaffaqiyatli o‘tgan.
“Sinov yakuniga ko‘ra, T-64MV tanki texnik tavsiflari, shu jumladan, dvigatel quvvati, tabiiy to‘siqlardan o‘tuvchanligi va otish qobiliyati kabi ko‘rsatkichlar bo‘yicha T-72 rusumli tankdan qolishmasligini ko‘rsatdi. Yuqoridagilarni inobatga olgan holda, mavjud T-64 tanklarni T-64MV tanki darajasigacha modernizatsiya qilishni yo‘lga qo‘yish va qo‘shinlarni T-64MV tanklari bilan qayta qurollantirish bo‘yicha ishlar jadal olib borilmoqda”, — deyiladi xabarda.
Avvalroq Mudofaa sanoati davlat qo‘mitasi “Kran va maxsus texnikalar” MChJ bilan hamkorlikda “Tarlon” (4x4) rusumli yengil zirhli avtomobilning (YZA) tajriba namunasini ishlab chiqishni boshlagani to‘g‘risida xabar berilgandi.
Izoh (0)