Olmaliq shahar Sanitariya-epidemiologiya osoyishtalik markazi qoshida zamonaviy statsionar virusologiya laboratoriyasi barpo etilmoqda. Qurilish ishlari “Olmaliq kon-metallurgiya kombinati” rahbariyati tashabbusi bilan kombinat tasarrufidagi “Olmaliqmetallurgqurilish” tresti tomonidan amalga oshirilmoqda. Bu haqda kombinat axborot xizmati xabar berdi.

Foto: “Olmaliq kon-metallurgiya kombinati” axborot xizmati

Trest bosh muhandisi Akmal Abduqodirovning ma’lum qilishicha, kombinat rahbariyati topshirig‘i asosida 2020-yil 15-iyul kuni qurilish ishlari boshlab yuborilgan. Qurilish ishlari 3 smenada tashkil etilgan bo‘lib, asosan, trest ishchi-xodimlari tomonidan olib borilmoqda.

Laboratoriya loyihasi Sanitariya–epidemiologik osoyishtalik agentligi bilan kelishilgan holda kombinatning Loyiha ishlari boshqarmasi tomonidan tayyorlangan.

Ma’lum qilinishicha, laboratoriya binosida 12 ta xona mavjud bo‘lib, ayni kunlarda ta’mir ishlarining deyarli 90 foizi bajarilgan. Bino ventilyatsion tizimi kombinat Ixtisoslashtirilgan ta’mir ishlari boshqarmasi tomonidan butkul yangilangan. Kanalizatsiya, issiq va sovuq suv tizimlari, elektr qismlari ishlari, obodonlashtirish ishlari yakuniga yetkazilgan. Tom qismiga zamonaviy qoplama yotqizilgan. Ayni paytda binoda plitkalarni o‘rnatish va tashqi fasad ishlari amalga oshirilmoqda. Kombinat tomonidan laboratoriya jihozlanib, PZR apparati ham olib beriladi.

Ta’kidlanishicha, statsionar virusologiya laboratoriyasini ushbu haftada foydalanishga topshirish rejalashtirilmoqda.

Laboratoriya ishga tushishi bilan olmaliqliklar koronavirus infeksiyasi bo‘yicha topshirilgan tahlil namunalari xulosasini 24 soatda olish imkoniga ega bo‘ladi.

Eslatib o‘tamiz, Olmaliqda bir necha kun oldin vafot etgan ikki ayolda o‘limidan so‘ng koronavirus tasdiqlangani ma’lum bo‘ldi, biroq Sog‘liqni saqlash vazirligi mazkur o‘lim holatlari haqida hozircha rasmiy ma’lumot bermagan. Shuningdek, Olmaliq shahridagi tibbiyot xodimida koronavirus aniqlangani haqida xabar berilgandi.