Tojikiston parlamentining navbatdagi qo‘shma majlisi 6-avgust kuni bo‘lib o‘tadi. Mazkur majlisda navbatdagi prezidentlik saylovi kuni e’lon qilinadi. Bu haqda “Asia-Plus” xabar berdi.
Nashrning yozishicha, Tojikistonda katta ehtimol bilan prezidentlik saylovi 2020-yilning 6-noyabriga belgilanadi. Tojikistonning amaldagi prezidenti Emomali Rahmonning vakolat muddati 2020-yil 6-noyabrda tugaydi.
Mamlakat qonunchiligiga ko‘ra, Tojikistonda prezident saylovi kuni respublika parlamenti ikkala palatasining qo‘shma majlisida amaldagi prezident vakolat muddati tugashidan kamida ikki oy oldin belgilanadi.
Konstitutsiya bo‘yicha Prezident umumiy, teng va to‘g‘ridan to‘g‘ri saylov huquqi bilan yashirin ovoz berish orqali 7 yil muddatga saylanadi.
Kamida 30 yoshga kirgan, faqat Tojikiston fuqaroligiga ega, oliy ma’lumotli, davlat tilida so‘zlashadigan va kamida so‘nggi 10 yil davomida respublikada yashagan shaxs respublika prezidentligiga nomzod bo‘lishi mumkin.
Bir shaxs nomzod sifatida ro‘yxatga olinishi uchun mazkur nomzodga kamida 5 foiz saylovchilarning imzolari kerak bo‘ladi.
Bitta shaxs ketma-ket ikki muddatdan ortiq prezident bo‘la olmaydi. Ushbu cheklov Tojikistondagi tinchlik va milliy birlik asoschisi — millat rahbari Emomali Rahmonga taalluqli emas.
Izoh (0)