Isroilda hamshiralar maoshlari oshirilishini talab qilib ish tashladi

Isroilda 20-iyuldan boshlab ish haqi oshirilishini talab qilgan tibbiyot hamshiralarining ish tashlashi boshlandi. Bu haqda The Jerusalem Post xabar berdi.

Ma’lum bo‘lishicha, yakshanba kuni mamlakat Moliya vazirligi bilan hamshiralar oyligini oshirish yuzasidan o‘tkazilgan muzokaralar muvaffaqiyatsiz yakunlangan. Shu sababli dushanbadan boshlash ish tashlash e’lon qilingan.

Bu vaqtda kasalxonalarda ish yakshanba kungi tartibda davom etgan. Faqat koronavirus hamda saraton kasalligi bo‘limlari, shuningdek, bemorlarga tezkor yordam beruvchi navbatchi hamshiralar odatiy tartibda ishlashda davom etgan.

Xabarda aytilishicha, aksariyat hamshiralar so‘nggi oylarda koronavirus yuqtirgan bemorlar davolanayotgan yuqumli kasalliklar shifoxonalariga yuborilayotganidan norozi. Shuningdek, ularning ko‘pchiligi karantinda bo‘lgani uchun qolganlar ikki baravar yuklama bilan ishlamoqda.

Ushbu voqea sababli ayrim rejalashtirilgan operatsiyalar bekor qilinadi, tahlilni qabul qilish hajmi kamaytirilib, vaksinatsiya qilinadigan klinikalar yopiladi.

Ish tashlashda ishtirok etgayotganlarning asosiy talabi sog‘liqni saqlash tizimidagi kichik va o‘rta hamshiralarning oyliklarini oshirishdir.

So‘nggi ma’lumotlarga ko‘ra, Isroilda koronavirusga chalinganlar soni 50 ming nafardan oshgan, shundan 21 mingdan ortig‘i sog‘aygan, 400 nafardan ortiq bermor COVID-19 qurboniga aylangan.