2020-yilgi AQSh prezidentligi saylovlarida ishtirok etishini ma’lum qilgan reper Kanye Uest Charlston shahrida birinchi bor saylovchilar bilan uchrashuv o‘tkazdi. Uchrashuv videosi WCBD-TV kanaliga joylashtirilgan.
Fox’ning yozishicha, uchrashuvga bir necha yuz kishi tashrif buyurgan va barchadan niqob taqish so‘ralgan. Kanye Uestning o‘zi esa yig‘ilganlar oldida egniga zirhli nimcha kiygan holda chiqish qilgan, sochi esa “2020” shaklida olingan. U mikrofondan foydalanmagan. Uchrashuv bir soatga yaqin davom etgan.
Billboard nashrining ma’lum qilishicha, uchrashuv davomida Kanye Uest abortlar mavzusiga to‘xtalib o‘tgan. U barcha taqiqlarga qarshi ekanligini bildirgan, biroq farzandini dunyoga keltirishga qiynalgan oilalarga moddiy yordam ko‘rsatish taklifini bildirgan. “Farzandi bor har bir odam million dollar yoki shunga o‘xshash moddiy rag‘bat olishi kerak”, — deydi Uest.
Uning so‘zlariga ko‘ra, reperning otasi onasini abort qildirishga ko‘ndirmoqchi bo‘lgan. “Otam shu qadar bandligi sabab Kanye Uest dunyoga kelmasligi mumkin edi”, — deydi reper. Uestning ta’kidlashicha, rafiqasi Kim Kardashyan birinchi marta homilador bo‘lganida u abort masalasini muhokama qilgan, biroq natijada ular bolani saqlab qolishga qaror qilgan. Uest bu gaplarni aytayotib, yig‘lab yuborgan.
Shuningdek, reper uchrashuv davomida qurollar, bir jinslilar mavzulariga ham to‘xtalib o‘tgan. Variety’ning yozishicha, Uestning chiqishi ijtimoiy tarmoqlarda musiqachining ruhiy sog‘lomligi to‘g‘risida bir qator savollarni yuzaga keltirgan.
Eslatib o‘tamiz, taxminan ikki hafta oldin reper 2020-yilning noyabrida AQSh prezidentligi uchun bo‘lib o‘tadigan saylovlarda ishtirok etmoqchiligini ma’lum qilgandi.
Izoh (0)