Andijonlik fuqaro farzandi o‘n kishi tomonidan ayovsiz kaltaklanib, og‘ir tan jarohati olganini, biroq ushbu jinoyat ishi ichki ishlar xodimlari tomonidan e’tiborsiz qolayotganini bildirmoqda. Adolat istab huquqni muhofaza qiluvchi organlarga murojaat qilgan ayolning aytishicha, mazkur holat bo‘yicha profilaktika inspektori hamda tergovchi tomonidan haligacha jinoyat ishi ochilmagan.
Mazkur adolatsizliklar haqida “Daryo” muxbiri Umidjon Mamarasulovga so‘zlab bergan Sohiba Qo‘chqorova hamda uning o‘g‘li Qudratilla Hasanboyev voqea 2020-yilning 9 va 14-aprel kunlari sodir bo‘lganini aytdi.
Qudratilla Hasanboyevning ma’lum qilishicha, janjal arzimas tushunmovchilikdan boshlangan. U do‘sti va Dilmurod ismli shaxsning o‘rtasiga tushib, ajratishga harakat qilgan xolos. Lekin o‘rtada katta janjal kelib chiqqan.
“2020-yil 9-aprel kuni soat 14:00 da ikki o‘rtog‘im bilan dadamning qabrini tozalagani mahalla qabristoniga chiqib ketayotgandik. Qabriston oldidan o‘tib ketayotsak, Dilmurod ismli kattaroq yoshdagi kishi qo‘ylarini boqib yurgan ekan. Shu payt ortimizdan bir it ham kelayotgan ekan. Dilmurod aka bizga qarab, ‘Ey, bolalar, itlaringni olinglar, qo‘ylarim qo‘rqib ketadi’ deb baqirdi. Shundan keyin itni chaqirdik. Do‘stim Javlon itga ‘Qoplon qayt orqangga, bo‘lmasam qulog‘ingni kesaman’ dedi. Dilmurod aka esa ‘Sen bola kimni so‘kyapsan, kimni ahmoq qilyapsan?’ deb Javlonning oldiga keldi va yelkasidan turtdi. Ikkalasi yoqalashishgacha bordi. Ularni ajratishga harakat qildim. Biz Dilmurod akadan uzr so‘radik. Lekin Dilmurod aka o‘g‘li va Mansur ismli jiyaniga telefon qilib, tezda kelmasa bo‘lmasligini aytdi. Hech qancha o‘tmasdan ular mashinada qo‘lida elektroshoker, bita, dubinka bilan yetib kelishdi. Nima bo‘lganini tushunib-tushunmasdan janjalga qo‘shilishdi. Baqir-chaqirlarni eshitgan odamlar oldimizga kelib muammoni tinch yo‘l bilan hal qilishga chaqirdi. Bir necha kishining aralashuvi bilan janjal tugab, hammamiz tarqaldik. Dilmurod aka esa hali barchamizga ‘borziy’lik qanaqa bo‘lishini ko‘rsatib qo‘yishini aytdi”, — deydi Qudratilla Hasanboyev.
Hasanboyevning qo‘shimcha qilishicha, o‘rtadagi janjal kechki payt u do‘stlari bilan do‘konga chiqqanida ham davom etgan. Urush profilaktika inspektorining chaqirilishi bilan yakunlangan.
“‘Borziy’likni ko‘rsatib qo‘yishga va’da bergan Dilmurod aka kechki payt soat 19:00 da 15-20 nafar odam yig‘ib, Damas, Cobalt, Gentra mashinalarida kelishdi. Ular bizning harakatimizni kuzatishayotganini bildik. Dilmurod aka olib kelgan bolalarning qo‘lida ketmon sopi, yog‘och, elektroshoker, bita, temir buyumlar bor edi. Do‘stlarim bilan do‘konga ketayotgandik, ular ham ortimizdan yetib keldi. Do‘kon eshigiga yetganimda ular meni va do‘stlarimni sudrab olib chiqib, hech qanday sababsiz qo‘lidagi temirlar bilan urib ketishdi. Biz bunday vaziyatni kutmagandik. Holatni tushungan do‘stlarim voqea joyidan qochib qutulishdi. Men esa 10 kishining ichida yolg‘iz qolib ketdim. Atrofda besh-oltita odam bor edi. Lekin ularning qo‘lidagi qurollarini ko‘rib, ajratishga hech kimning haddi sig‘madi. Insofi bor qo‘shnilar telefon orqali ‘uchastkavoy’ni chaqirishibdi. Inspektor kelayotganini ko‘rishgach, zo‘ravonlar qochishdi. Biroq hech kimga hech qanday chora ko‘rilmadi”, — deydi Qudratilla Hasanboyev.
Sohiba Qo‘chqorovaning aytishicha, bunday holat besh kundan so‘ng yana qaytarilgan. Navbatdagi janjalda Qudratilla Hasanboyevning boshi 10-15 santimetrgacha yorilgan.
“14-aprel kuni kichik o‘g‘lim ikki marotaba do‘konga chiqdi. Yo‘lda Dilmurodning o‘g‘lini ko‘rgan. Shunda u o‘g‘limni to‘xtatib, bo‘lar-bo‘lmas gaplarni gapirib, haqorat qilgan. G‘alvani istamagan o‘g‘lim ‘Bo‘lar ish bo‘ldi, senga yana nima kerak?’ desa elektroshoker, bita chiqarib, uni urmoqchi bo‘lgan. O‘sha paytda kichik o‘g‘lim ham kasal edi. Yuzlariga suvchechak toshgandi. Shuning uchun u ortga qaytgan. Qudratilla o‘g‘lim ham kechki payt farzandiga taglik olish uchun do‘konga chiqqan. Dilmurodning o‘g‘li uyiga borib dadasiga bo‘lgan voqeani aytib, yana odam yig‘ib ikkita mashinada o‘n kishi kelishgan. O‘g‘lim do‘kon ichida bo‘lgan. Dilmurod do‘konga kirib Qudratillaga ‘Katta gapirgan ukang qani, polvon ukangni chaqir’, deb po‘pisa qilib ichkaridan sudrab chiqqan. Tashqariga chiqqach qo‘lidagi temir, yo‘lakda turgan g‘isht va toshlar bilan urib ketgan. Voqea 10 daqiqacha davom etgan. O‘g‘lim hushidan ketgan. O‘g‘lim qimirlamay qolganidan keyin urushni to‘xtatib, o‘ldi deb hushsiz, qonga belangan holatda tashlab ketishgan. O‘shanda boshi 10-15 santimetrcha yorilgan ekan. Zo‘ravonlar ketgach, odamlar tez yordamni chaqirishgan va shifokorlar olib ketgan”, — deydi Sohiba Qo‘chqorova.
Qo‘chqorovaning ma’lum qilishicha, tibbiy ekspertiza o‘g‘lini profilaktika inspektori olib kelmagani uchun ekspertizadan o‘tkazmasdan qaytarib yuborgan. Shunday bo‘lsa-da, soxta ekspertiza xulosasi tayyorlanib, olingan tan jarohati yengil deb qayd qilingan.
“Ertasi kuni ertalab aka-ukani tibbiy ekspertizaga yubordim. Lekin ekspertizadagilar uchastka nozirisiz qabul qilmaymiz, deyishgan. Tartib bo‘yicha ‘uchastkovoy’ olib borib, ekspertiza qildirishi kerak ekan. Lekin ‘uchastkavoy’ bilan bog‘lanib bo‘lmadi, bog‘langanimizda esa hech qanday harakat qilmadi. Oddiy fuqaro bo‘lsak, biz bularni qaydan bilaylik? Uch kundan keyin profilaktika inspektori yordamchisi ekspertiza qildiraman deb kelgandi, karantin deyishdi. Shu bahona bo‘lib ‘uchastkavoy’ kasalxonaga, ekspertiza ‘uchastkavoy’ga aybni ag‘darishi sabab, ekspertiza qilinmasdan qoldi. O‘g‘limning jarohatlari bitay deganda — 4-may kuni qayta ekspertiza tayyorlab beraman, deb ‘uchastkavoy’ kasallik tarixini oldi. Endi shu qog‘ozni ko‘rsatib, ekspertiza qilingan deyapti. Aslida haligacha ekspertiza qilinmagan”, — deydi onaizor.
Murojaatchining ta’kidlashicha, profilaktika inspektori hamda tergovchi jinoyatni yashirishga urinmoqda.
“Karantin paytida hamma uyda o‘tirishi kerak bo‘lgan vaqtda bular guruh bo‘lib, til biriktirib jamoat joyida bir odamni o‘lgudek kaltaklashsa, birortasi hech narsa demasa. Qonun himoyachilari, tibbiy niqobsiz yurganlarga, mayda bezorilarga ishlasa-yu, mana bunaqa jinoyatlarga jim qarab tursa, alam qilmaydimi? Tergovchiga do‘konga o‘rnatilgan kuzatuv kameralari orqali olingan videoyozuvlarni ham berdik, e’tiborga olishmayapti. Bu esa ichki ishlar xodimlari va jinoyatchilar o‘rtasida qandaydir aloqa bor, degan shubhani uyg‘otmoqda”, — deydi Sohiba Qo‘chqorova.
“Yugur-yugurlar, tinimsiz qilingan murojaatlarimizdan so‘ng bu ish tergovga chiqarildi. Lekin tergovchi va ‘uchastkavoy’ zo‘ravonlarning qo‘lida bo‘lgan elektroshoker, bitalarni guvohlar tasdiqlasa ham inkor etmoqda. Bundan tashqari do‘konga o‘rnatilgan kuzatuv kameralari orqali olingan videoyozuvlarda 10 kishi ishtirok etgani ko‘rinib tursa-da, faqat ikki kishini so‘roq qilmoqda. Qolganlarni nafaqat videoyozuv, balki guvohlar ham tasdiqlasa-da e’tiborga olishmayapti. To‘g‘risi, murojaat qilmagan, bormagan joyimiz qolmadi. Ariza qilgan kunimning ertasiga o‘rganishgandek bo‘lishadi. Keyin yo‘qolib ketishadi. Nahotki uch oydan beri real holatdagi jinoyatga e’tibor qaratishmasa?”, — deydi murojaatchilar.
Andijon viloyat IIBning ma’lumot berishicha, yuqorida tilga olingan fuqarolar o‘rtasida 2020-yil 9-aprel kuni soat 15:00 da va o‘sha kuni kechki payt ham urush-janjal bo‘lgan. Kelishmovchilik 2020-yilning 14-aprel kuni soat 20:00 da davom etgan. Mazkur holat yuzasidan o‘tkazilgan sud-tibbiy ekspertizasining 2020-yil 4-may kunidagi xulosasiga ko‘ra, mazkur to‘polon sabab fuqaro Qudratilla Hasanboyevning sog‘lig‘i olti kundan ko‘proq va yigirma bir kungacha buzilishiga sabab bo‘ladigan yengil tan jarohati olgan.
Holat yuzasidan Andijon shahar ichki ishlar organlari faoliyatini muvofiqlashtirish boshqarmasi 3-son ichki ishlar bo‘limi huzuridagi tergov bo‘linmasi tomonidan 2020-yil 4-may kuni R.D., R.F. va M.A. hamda boshqalarga nisbatan Jinoyat kodeksining 109-moddasi 2-qismi (Sog‘liqning qisqa vaqt, ya’ni olti kundan ortiq, ammo yigirma bir kundan ko‘p bo‘lmagan muddatga yomonlashuviga yoki umumiy mehnat qobiliyatining uncha uzoq bo‘lmagan muddatga yo‘qotilishiga sabab bo‘lgan qasddan badanga yengil shikast yetkazish) bilan jinoyat ishi qo‘zg‘atilgan.
Viloyat IIBning qo‘shimcha qilishicha, murojaatchilarga mazkur holat bo‘yicha jinoyat ishi qo‘zg‘atilganligi va hozirda tergov harakatlari olib borilayotganligi aytilgan.
“Daryo” voqealar rivojini kuzatishda davom etadi.
Izoh (0)