Апрель ойи бошларида Осиё тараққиёт банки 2020 йилда Ўзбекистоннинг газ ва мис экспорти сезиларли даражада камайишини башорат қилган, аммо бу олтин экспортининг ўсиши билан қопланишини кутган эди, деб ёзмоқда Spot. Давлат статистика қўмитаси маълумотларига кўра, ушбу прогноз ҳозирча ўзини оқламоқда.
Қайд этилишича, биринчи ярим йиллик якунларига кўра, Ўзбекистон 234,6 миллион долларга газ экспорт қилди, бу ўтган йилга нисбатан 76 фоизга кам. Нефть етказиб бериш 60 фоизга, рангли металлар етказиб бериш эса 30 фоизга камайди.
Асосий сабаб коронавирус пандемияси бўлиб, бу ташқи бозорларга талабнинг пасайишига олиб келди. Хусусан, Хитойга газ этказиб бериш уч баравар камайди ва Россияга етказиб бериш эса бутунлай тўхтади.
Олтин экспорти, ўз навбатида 33,8 фоиз улуши билан биринчи ўринда турибди. Таққослаш учун, аввалги икки йилда унинг улуши 26 фоиздан ошмаган. Ўзбекистон йил бошидан жами 2,1 миллиард долларга олтин сотган.
Шу йилнинг май ойи бошида Марказий банк 2020 йил учун янгиланган прогнозни эълон қилган, у бошқа прогнозлар сингари пессимистик руҳда эди. Улар орасида ижобийларидан бири айнан олтин эди.
Регулятор, нархларнинг кўтарилиши давлат бюджети даромадларига, бу эса ўз навбатида иш ҳақи, пенсиялар ва бошқа ижтимоий харажатларга ижобий таъсир қилади деб ҳисоблайди.
Аввалроқ олтин нархи 1,4 фоизга, яъни бир унсия учун 1803 АҚШ долларига қимматлашиб, 2011 йилдан буён энг юқори кўрсаткичга етгани хабар берилганди. Бунга коронавирус пандемиясининг иккинчи тўлқини хавфи, АҚШ ва Хитой ўртасидаги зиддиятлар, шунингдек, ривожланган давлатлар иқтисодиётига кенг кўламли маблағлар жалб қилиниши сабаб бўлганди.
2019 йилнинг охиридан бошлаб олтин нархи 20 фоиздан кўпроққа қимматлашиб, кўплаб молиявий инструмент ва индексларнинг ўсиш темпини ортда қолдирган. Бозор иштирокчилари қисқа муддатда олтин нархининг янада кўтарилишини кутмоқда.
Изоҳ (0)