O‘zbekistonda koronavirusdan davolanayotganlar soni rasman 5700 dan oshdi. Ularning qanchasi kasalxonalarda davolanmoqda — noma’lum

O‘zbekistonda 14-iyul soat 10:00 holatiga ko‘ra rasman 5778 kishi koronavirusdan davolanmoqda. Bu haqda Sog‘liqni saqlash vazirligi xabar berdi. Qayd etish joiz, bu vaqtga kelib jami kasallanish holatlari soni 13 872 taga yetgan.

“Hozirda mamlakatimizda 5778 nafar bemorga shifokorlarimiz tomonidan belgilangan standartlar bo‘yicha davo choralari ko‘rilmoqda. Ulardan 53 nafari og‘ir, 7 nafari esa o‘ta og‘ir ahvolda”, — deyiladi vazirlik axborotida. Ushbu bemorlarning qanchasida kasallik alomatsiz kechayotgani ham ma’lum qilinmagan.

Ma’lumot uchun, O‘zbekistonda koronavirus epidemiyasi sabab sog‘liqni saqlash tizimiga tushayotgan yuklamani bir qadar yengillatish maqsadida 5-iyuldan boshlab koronavirus infeksiyasi alomatsiz kechayotgan bemorlarga uy sharoitida davolanishga ruxsat berilgan, ushbu yo‘nalishda yo‘riqnoma va eslatmalar ham e’lon qilingan.

Biroq Sog‘liqni saqlash vazirligi koronavirusga chalinganlarga doir axborotlarida yangi bemorlarning qanchasida kasallik alomatsiz (simptomsiz) kechayotganiga aniqlik kiritmayapti, shu boisdan ayni vaqtda koronavirusdan davolanayotgan bemorlarning qanchasi kasalxonalarda qolayotgani, qanchasi uy sharoitida davolanayotgani ma’lum emas.

Avvalroq Respublika maxsus komissiyasi 10-iyul holatiga ko‘ra, O‘zbekistonning mavjud sog‘liqni saqlash muassasalari quvvati koronavirusga chalingan yangi bemorlarni qabul qilish uchun yetarli emasligi, “tizimni qayta tiklash” uchun 1-avgustgacha kuchaytirilgan karantin tartibi qaytadan joriy etilganini ma’lum qilgan edi. O‘sha vaqtda O‘zbekiston bo‘yicha koronavirusdan davolanayotgan bemorlar soni rasman 3986 nafar edi.

Iqtisodiy tadqiqotlar va islohotlar markazi rahbari Obid Hakimov keltirgan ma’lumotlarga ko‘ra, Toshkentda jami 16 ta kasalxonada koronavirus bilan kasallangan bemorlar uchun 3580 ta koyka-o‘rin ajratilgan. 14-iyul soat 10:00 holatiga ko‘ra Toshkent mintaqasining o‘zida 4584 kishi koronavirusdan davolanmoqda, biroq ularning qanchasi Toshkent shahrida, qanchasi Toshkent viloyatida davolanayotgani ma’lum qilinmagan.

E’tiborga molik tomoni, professor Oqilov 8-iyul kuni qilgan chiqishida O‘zbekiston sog‘liqni saqlash tizimidagi resurslar “poyoniga yetgani”, bo‘sh koyka-o‘rinlar qolmaganini ma’lum qilgan edi. 9-iyuldagi brifingda esa Oqilov “koyka-o‘rinlar, dori zaxirasi mavjud”ligini, tizim “har qancha bemorni qabul qila olishi”ni ta’kidladi.