“Bunyodkor” ishtirokidagi uchrashuv qoldirildi. Jamoa futbolchisi koronavirus yuqtirib olganlikda gumon qilinmoqda

Coca-Cola Superliga 9-turidan o‘rin olgan “Buxoro” — “Bunyodkor” uchrashuvi noma’lum muddatga qoldirildi.

Professional futbol Ligasi (PFL) rasmiy saytining ma’lum qilishicha, “Bunyodkor” futbolchilaridan biri koronavirus infeksiyasini yuqtirib olganlikda gumon qilingan. Shu sabab nomi oshkor qilinmagan futbolchi izolyatsiyaga olingan. “Bunyodkor” bazasida dezinfeksiya ishlari amalga oshirilgan, barcha jamoa a’zolari virusga test topshiradi. Hammasi joyida bo‘lgan taqdirda, futbolchilar shifokorlar nazorati ostida mashg‘ulotlarni davom ettirishga ruxsat etiladi.

Shuningdek, “Bunyodkor” bilan 7-iyul kuni bahs olib borgan “Navbahor” futbolchilari ham tekshiruvdan o‘tkaziladi. Ta’kidlanishicha, hozirda “Navbahor”ning barcha futbolchilari o‘zini yaxshi his qilmoqda.

Ma’lumot uchun, “Buxoro” — “Bunyodkor” uchrashuvi 14-iyul kuni bo‘lib o‘tishi rejalashtirilgandi.