«Бунёдкор» иштирокидаги учрашув қолдирилди. Жамоа футболчиси коронавирус юқтириб олганликда гумон қилинмоқда

Coca-Cola Суперлига 9-туридан ўрин олган «Бухоро» — «Бунёдкор» учрашуви номаълум муддатга қолдирилди.

Профессионал футбол Лигаси (ПФЛ) расмий сайтининг маълум қилишича, «Бунёдкор» футболчиларидан бири коронавирус инфекциясини юқтириб олганликда гумон қилинган. Шу сабаб номи ошкор қилинмаган футболчи изоляцияга олинган. «Бунёдкор» базасида дезинфекция ишлари амалга оширилган, барча жамоа аъзолари вирусга тест топширади. Ҳаммаси жойида бўлган тақдирда, футболчилар шифокорлар назорати остида машғулотларни давом эттиришга рухсат этилади.

Шунингдек, «Бунёдкор» билан 7 июль куни баҳс олиб борган «Навбаҳор» футболчилари ҳам текширувдан ўтказилади. Таъкидланишича, ҳозирда «Навбаҳор»нинг барча футболчилари ўзини яхши ҳис қилмоқда.

Маълумот учун, «Бухоро» — «Бунёдкор» учрашуви 14 июль куни бўлиб ўтиши режалаштирилганди.