Surxondaryoning Denov tumani hokimligi matbuot xizmati 7-iyul, seshanba kuni ijtimoiy tarmoqlarda tarqalgan “Xalq yana ko‘tarildi. Vaziyat jiddiy” sarlavhali videolavhaga rasmiy munosabat bildirdi. Videoda tuman markazidagi “Bobodehqon bozori”da savdo qiluvchi tadbirkorlar eski bozorning yopilishi, rastalar va savdo do‘konlari yangisiga ko‘chirilishidan norozi bo‘lgani aks ettirilgan.
Qayd etilishicha, Denov tumani markazida joylashgan dehqon bozori atrofi butunlay izdan chiqqanligi va aholiga juda katta noqulayliklar keltirib chiqarayotganligi inobatga olinib, markaziy dehqon bozori va uning atrofidagi xizmat ko‘rsatish obyektlarini “Namozgoh” mahallasida yangi qurilgan zamonaviy bozorga ko‘chirish belgilangan.
Shunga muvofiq, hozirda eski dehqon bozori yangisiga ko‘chirilgan. Bu yerda sotuvchi va xaridorlar uchun zarur barcha qulayliklar yaratilgan. Bozorda 1300 o‘rinli savdo rastalari mavjud bo‘lib, dehqonlarga o‘z ulgurji mahsulotlarini sotishlari uchun ham sharoitlar qilingan. Bundan tashqari, 43 ta do‘kon ham oziq-ovqat mahsulotlari sotishga moslashtirilgan. Bir qator umumiy ovqatlanish shoxobchalari, avtomobillar uchun turargoh ham bor.
“Ijtimoiy tarmoqlar orqali e’lon qilingan videolavhada tuman hokimligi vakillarining markaziy dehqon bozori atrofidagi xizmat ko‘rsatish obyektlari egalari bilan uchrashuvi aks etgan bo‘lib, unda mulk egalari eski dehqon bozori atrofidagi xizmat ko‘rsatish obyektlari binosi uchun kompensatsiya berish, yangi dehqon bozori hududidagi oziq-ovqat mahsulotlari sotishga moslashtirilgan do‘konlardan joy ajratishni so‘rashgan.
Uchrashuvda mulk egalarining ushbu talablari inobatga olinishi, ularga tegishli obyektlar qiymati baholovchi tashkilotlar tomonidan to‘liq baholab bo‘lingach, o‘rnatilgan tartibda kompensatsiya to‘lovlari to‘lab berilishi, shungacha yangi dehqon bozoridagi oziq-ovqat mahsulotlari sotishga moslashtirilgan do‘konlarda ijara shartnomasi asosida faoliyat yuritishlari mumkinligi tushuntirildi”, — deyiladi hokimlikning rasmiy munosabatida.
Izoh (0)