Sardoba falokatidan jabr ko‘rgan ayol 2 farzandi bilan ko‘chada qolgani, na va’da qilingan pul va na uyni “remont” qilib berilganidan shikoyat qilib, murojaat yo‘llagani to‘g‘risida xabar berilgandi. Sardoba tuman hokimligining “Daryo”ga ma’lum qilishicha, fuqaroning murojaati tuman hokimligi Mahalla va oilani qo‘llab-quvvatlash bo‘limi, “Yurtdosh” mahallasi faollari hamda ishchi guruh a’zolari bilan hamkorlikda o‘rganib chiqilgan.
Ma’lumotlarga ko‘ra, o‘rganish davomida fuqaro Gulnoza Muratova turmush o‘rtog‘i Nodir Muratov hamda 2 nafar farzandi bilan “Yurtdosh” MFY Orasta ko‘chasidagi raqamsiz xonadonda birga istiqomat qilgani aniqlangan. Ishchi guruh tomonidan suv toshqinidan talafot ko‘rgan xonadonlarni o‘rganish jarayonida fuqaro Gulnoza Muratovaning yashash uyida hech kim bo‘lmaganligi, turmush o‘rtog‘i Rossiyaga ishlash uchun ketganligi, oilaviy kelishmovchiliklar sababli qaynatasi uy-joyning kadastr hujjatlarini o‘zining nomiga rasmiylashtirib olganligi ma’lum bo‘lgan.
Ammo ushbu xonadonda fuqaro Gulnoza Muratova doimiy istiqomat qilib kelgan, suv toshqini oqibatida talafot ko‘rgan xonadonlar ro‘yxatiga kiritilganligiga qaramay, ushbu ko‘chada fuqaro Norboy Muratov (qaynata) doimiy istiqomat qilgan xonadon ham o‘zining nomida bo‘lgan. Bir fuqaro nomiga ikki marta bank plastik kartasi rasmiylashtirilmasligi sababli kompensatsiya puli hamda maishiy texnikalar uchun sertifikatlar berilmagan.
Qayta o‘rganish davomida fuqaro Gulnoza Muratova doimiy istiqomat qilgan xonadoni tegishli mutasaddi tashkilotlar tomonidan imzolangan talafot ko‘rgan xonadonlarning qo‘shimcha ro‘yxatiga kiritilgan. Yaqin kunlar ichida Prezident tomonidan moddiy yordam sifatida berilayotgan 40 million so‘mlik kompensatsiya puli hamda maishiy texnikalar uchun sertifikatlar beriladi.
Ma’lum qilinishicha, Gulnoza Muratovaga Sardoba tumani “Do‘stlik” mahallasida qurilayotgan yangi ko‘p qavatli xonadonlardan biri beriladi.
Ma’lumotlarga ko‘ra, Sirdaryo viloyatidagi zarar yetgan xonadonlarni ta’mirlashga (1773 ta uy) 123 milliard so‘m yo‘naltiriladi, shuningdek, yana 3 ta yangi uy-joylar dahasi quriladi, uning ichidan 1 ta maktab, 66 ta uy, 1 ta maktabgacha ta’lim tashkiloti hamda bitta qishloq oilaviy poliklinikasi joy oladi.
Eslatib o‘tamiz, Prezident Shavkat Mirziyoyev 15-may kuni Sardoba tumaniga amalga oshirgan tashrifi davomida mahalliy aholi vakillari bilan uchrashib, falokatdan jabr ko‘rgan aholiga 40 million so‘mlik sertifikatlarni topshirgan edi. 2-iyun holati bo‘yicha, Sardoba falokatidan jabrlangan 4025 kishi Prezident tomonidan berilgan 40 million so‘mni olgan, qariyb 68 ming kishi o‘z uyiga qaytgan.
Izoh (0)