O‘zbekistonda oxirgi bir oy ichida bozorlar va turli tashkilotlarda koronavirusga chalinish holatlari aniqlangan. Bu haqda sog‘liqni saqlash vaziri Alisher Shodmonov “O‘zbekiston 24” telekanaliga bergan intervyusida ma’lum qildi.
Vazirning aytishicha, oxirgi bir oyda Toshkent shahridagi “O‘rikzor” bozorida 35 ta, “Yunusobod” bozorida 39 ta, “Chorsu” bozorida 11 ta, “Abu Saxiy” bozorida 47 ta, “Chilonzor buyum bozori”da 52 ta holatda virus aniqlangan.
Vazirning so‘zlariga ko‘ra, mazkur bemorlar orasida bozorlarda ishlaydigan xodimlar, sotuvchilar va xaridorlar bor.
Shuningdek, savdo majmualarining xodimlari va u yerga tashrif buyurganlar orasida 20 ta holatda koronavirus aniqlandi.
Bundan tashqari, vino ishlab chiqaruvchi bitta korxonada 71 kishida koronavirus qayd etilgan. Banklarning 34 nafar xodimida, qurilish tashkilotlarida 200 dan ortiq kishida virus aniqlangan.
Tadbirkorlik obyektlarida 63 ta, mehmonxonalarda 15 ta, davlat idoralarida 18 ta, aksiyadorlik jamiyatlarida 17 ta holatda koronavirusga chalinish kuzatilgan.
Mavzuga doir: Alisher Shodmonov O‘zbekistonda koronavirus avj olsa, tibbiyot og‘ir vaziyatga tushib qolishi mumkinligini aytdi (video)
Eslatib o‘tamiz, O‘zbekistonda koronavirus bilan bog‘liq vaziyat keskinlashayotgani sababli 10-iyuldan buyum bozorlari yopiladi.
