Osiyo Kubogi—2027 musobaqasiga mezbonlik qilmoqchi bo‘lgan davlatlar qanday shart va talablarni bajarish kerakligi ma’lum bo‘ldi.
O‘zbekistonlik futbol mutaxassisi Alisher Nikimbayevning yozishicha, asosiy talablar quyidagilardan iborat: Xalqaro aeroportdan 200 kilometr oralig‘ida joylashgan kamida 2 ta shahar va 8 ta stadion, shu bilan birga har bir stadionning minimal sig‘imi guruh bosqichi bahslari (ochilish o‘yinidan tashqari), 1/8 va 1/4 o‘yinlari uchun 20 mingdan kam bo‘lmasligi kerak.
Yarim final o‘yinlari uchun 40 ming kishini o‘z bag‘riga sig‘dira oladigan stadion, ochilish va final uchun uchrashuvlari uchun esa 50 ming kishilik stadionlar kerak bo‘ladi. Shuningdek, stadionlardagi yoritish tizimi 2,5 ming lyuksdan kam bo‘lmasligi lozim.
Shu bilan birga mezbon mamlakatda kamida 30 ta besh yulduzli mehmonxonalar faoliyat yuritishi kerak.
Avvalroq Osiyo Kubogi—2027 musobaqasi mezbonligiga o‘z nomzodini qo‘ygan mamlakatlar ro‘yxati ma’lum qilingandi. O‘zbekistondan tashqari Hindiston, Qatar, Eron va Saudiya Arabistoni musobaqaga mezbonlik qilish istagini bildirgan.
Hozirda OFK tender qatnashchilarining imkoniyatlarini baholashni boshlab yuborgan, yakuniy qaror 2021-yilda chiqariladi.
Ma’lumot uchun, so‘nggi Osiyo Kubogi musobaqasi 2019-yilning yanvar oyida BAAda bo‘lib o‘tgan va unda O‘zbekiston terma jamoasi 1/8 finalda penaltilar seriyasi bo‘yicha Avstraliyaga yutqazib, musobaqani tark etgandi. 2023-yilgi musobaqaga esa Xitoy mezbonlik qiladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)