Samarqandning “Sherdor” va Navoiyning “Ittifoq Navoiy” futbol klublari belgilangan talablarni bajarmagani hamda qatnashchilik badali va boshqa to‘lovlarni o‘z vaqtida to‘lamagani uchun Professional futbol ligasi qatnashchilari safidan chiqarildi. Bu haqida tashkilot rasmiy saytida xabar berildi.
Mazkur qaror Professional futbol ligasi Ijroiya qo‘mitasining 2020-yil 30-iyundagi 04-sonli yig‘ilish bayoniga asosan chiqarilgan.
Ta’kidlanishicha, “Sherdor” futbol klubi 2018-yilda, “Ittifoq Navoiy” futbol klubi esa 2019-yilda Pro-Ligada ishtirok etishi uchun shartli ravishda qabul qilingan. Ularning shartli qabul qilinishiga esa klub rahbarlarining talablarni bajarish yuzasidan O‘zPFLning o‘sha vaqtdagi rahbarlariga (U vaqtda PFL direktori Omon G‘ofurov edi — tahr.) bergan va’dasi sabab bo‘lgan.
Qayd etilishicha, ikkala klub ham o‘sha va’dalarni haligacha bajarmagan. PFL ikkala klubga ham Birinchi Ligada emas, balki Ikkinchi Ligada ishtirok etishi mumkinligini tavsiya qilgan.
Shuningdek, tashkilot agar ushbu klub futbolchilari bilan mehnat shartnomalari bekor qilinsa va o‘sha futbolchilar PFL tasarrufidagi musobaqalarda ishtirok etuvchi boshqa klublar bilan shartnoma imzolasa, ularning mehnat shartnomalari ro‘yxatdan o‘tkazib berilishini ma’lum qilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)