Туркманистон президенти Гурбангули Бердимуҳамедов «Гўктепа» масжидида пайғамбар ёшига тўлиши муносабати билан одамларга эҳсон улашди. Туркманистондаги анъаналарга кўра «Оқ қўчқор байрами» («Ак гоюн тойи») нишонланди. Бу ҳақда «Туркманистон» интернет газетаси хабар қилган.
Бердимуҳамедов масжидга келиш чоғида оқсоқоллар билан суҳбатлашган, улар президентни таваллуд куни билан табриклаб, мустаҳкам соғлиқ, узоқ умр ва фаолиятида муваффақиятлар тилаган. Туркманистон президенти урф-одатни адо этишдан аввал қисқа нутқ сўзлаган.
«63 ёш пайғамбар ёши бўлгани учун халқ орасида миллий қадриятга айланган. Туркман халқи эса бу даврга ўзгача аҳамият билан қарайди. Турли синовлардан ўтиб ушбу ёшгача етиб келган ҳар бир инсон яхшини ёмондан ажрата олишни ўрганади. Ғам ва қувончни англаб етган, ҳаётий тажрибага эга инсон бошқалар учун ҳам ўрнак бўла олади», – деган Гурбангули Бердимуҳамедов.
Шунингдек, Туркманистон давлат раҳбари тадбирда иштирок этганларга мамлакатда аҳолининг турмуш шароитини яхшилаш борасида амалга оширилаётган ишлар ҳақида ҳам гапирган. Нутқдан кейин масжидда оқ қўчқорни сўйиш маросими ўтказилди.
29 июнь куни оқшомда Ашхободдаги майдонда Гурбангули Бердимуҳамедовнинг туғилган куни муносабати билан байрам концерти ўтказилган.
Изоҳ (0)