Qirg‘izistonning sobiq prezidenti Almazbek Atambayev o‘pkaning ikki tomonlama pnevmoniyasi bilan kasalxonaga yotqizildi. Bu haqda Qirg‘iziston milliy xavfsizlik qo‘mitasi matbuot markazi ma’lum qildi, deb yozmoqda “RBK”.
Atambayev 29-iyun kuni o‘zini yomon his qilayotganini aytgan, undan koronavirusga tahlil olingan, biroq tahlil Atambayevda kasallik yo‘qligini ko‘rsatgan.
Ma’lum qilinishicha, shifokorlar bilan onlayn konsilium o‘tkazilgan, shundan so‘ng sobiq prezidentga ikki tomonlama pnevmoniya tashxisi qo‘yilgan. Keyin esa Atambayev statsionar davolanish uchun kasalxonaga o‘tkazilgan.
Eslatib o‘tamiz, Qirg‘izistonning sobiq prezidenti Almazbek Atambayev katta ta’sirga ega bo‘lgan jinoyatchi Aziz Batukayevni qamoqdan ozod qilish bo‘yicha korrupsiyada aybdor deb topilib, 11 yilga ozodlikdan mahrum etilgandi.
Avvalroq Qirg‘izistonning sobiq bosh vaziri Sapar Isoqov korrupsiyada ayblanib 18 yilga ozodlikdan mahrum qilingandi.
Qirg‘izistonda 30-iyun holatiga ko‘ra, COVID-19 bilan kasallanganlar soni 5296 kishiga yetdi, ularning 57 nafari virus qurboniga aylangan. Hozirga qadar 2370 nafar bemor davolanishga muvaffaq bo‘lgan.
Izoh (0)