Voronej oblasti hakamlik sudi GM Uzbekistan avtokonsernining sobiq bosh direktori, Voronejdagi Uz-Daewoo avtomobillari dileri va “Km/ch” avtosalonlar tarmog‘ining sobiq egasi, hududda bankrotlik e‘lon qilgan Tohirjon Jalilovning 500 million rublga yaqin qarzdorligini kreditorlar reyestriga kiritdi, deb xabar beradi “Kommersant”
“Vozrojdeniye” banki biznesmenning kreditorlar talablari reyestriga bir nechta kredit shartnomalari, qarz foizlari va komissiyalar bo‘yicha 209,68 million rubl kiritgandi.
Sankt-Peterburgdagi “Auditorsko-konsaltingovaya yuridicheskaya firma “Obyedinennaya yuridicheskaya kollegiya” MChJ kafillik shartnomasi bo‘yicha 299,22 million rubl qarz bilan Jalilovning bankrotligiga qo‘shildi.
“O‘zbekoziqovqatxolding” kompaniyasi saytidagi ma’lumotlarga ko‘ra, Tohir Jalilov 1990-yillarda UzDEUavto kompaniyasida ishlagan, shu jumladan, 2003-yilgacha kompaniyani boshqargan.
Keyin esa UzDEUavto Saratov yopiq aksiyadorlik jamiyatining bosh direktori etib tayinlangan. Bir vaqtning o‘zida, 2004—2006-yillarda Kiyevda “Ukr-O‘zavto” MChJ bosh direktori vazifasini bajaruvchi bo‘lgan. 2007—2009-yillarda o‘rindoshlik asosida “O‘zavtoRus” MChJ direktori vazifasini bajaruvchi lavozimida ham ishlagan.
2009—2010-yillarda Tohir Jalilov General Motors Uzbekistan’ning marketing, savdo va xizmat ko‘rsatish bo‘yicha boshqaruvchi direktori lavozimida ishlagan. 2010—2017-yillarda u “O‘zavtosanoat” AJ raisi o‘rinbosari, bir vaqtning o‘zida GM Uzbekistan bosh direktori lavozimi egallagan. 2017-yildan buyon Tohir Jalilov “O‘zbekoziqovqatxolding” kompaniyasiga rahbarlik qilmoqda.
Izoh (0)