Professional futbol ligasi (PFL) klublarni Superliga o‘yinlari vaqtida sanitariya-gigiyena qoidalarga amal qilishga chaqirdi.
PFL barcha futbol klublari vakillari bilan uchrashib, o‘yin vaqtida maydonga tupurmaslik va og‘iz chayqaganda suvni maydonga tashlamaslik shartlarini qo‘ydi. Futbolchilarga buning uchun maydon chetiga joylashtirilgan maxsus tufdonlardan foydalanishi tavsiya qilingan.
PFL mazkur talablar xalqaro tashkilotlar tomonidan ma’qullanganini alohida ta’kilagan.
“Bundesliga va APL bu masalaga jiddiy yondashmoqda, FIFA ham futbolchilarning bu odatini tartibga solish kerakligini aytmoqda. Jumladan, FIFA meditsina qo‘mitasi vakili Mishel D’Xoge futbolchilar o‘yin vaqtida ayrim odatlaridan voz kechishi kerakligini, birinchi navbatda maydonga tupurishni taqiqlash kerakligini aytdi: ‘Bu futboldagi odatiy holat, ammo gigiyenaga zid odatdir. Birinchi navbatda undan voz kechish kerak, buning uchun hatto sariq kartochka ko‘rsatish lozim’.
Kembrij universiteti virusologi Yan Brayerli bu borada shunday deydi: ‘Agar simptomsiz bemor maydonga tupursa, bu virus tarqalishi uchun potensial tashuvchiga aylanishi mumkin’. Oddiy sxema: COVID-19 tashqi muhitda uch soatgacha tura olishi hisobga olinsa, virus maydon chimidan to‘pga, butsalarga, kiyimga va qo‘lga o‘rnashishi, ulardan ko‘z, burun va og‘iz shilliq qavatlariga tushishi mumkin. Tabiiyki, ular orqali insonga infeksiya yuqishi oson”, — deyiladi tashkilot bayonotida.
Shuningdek, PFL agar biror klub vakilida koronavirus aniqlanadigan bo‘lsa, butun jamoa karantinga olinishi va bu shundoq ham o‘zgarib ketgan taqvimda yanada murakkabliklarni keltirib chiqarishini aytgan.
“Bugunga kelib biz futbol mavsumidagi kamida uch oyni boy berdik. Ya’ni, biror klubda zararlangan futbolchi yoki personal aniqlansa, bu bizga qimmatga tushishi mumkin. Chunki PFL oldida futbol mavsumini eson-omon yakunlab olish vazifasi turibdi. Agar biror futbolchida zararlanish holati aniqlansa, klub karantinga olinadi. Bu esa tabiiyki, PFLni ham, liganing qolgan jamoalarini ham murakkab vaziyatda qoldiradi. Shundan kelib chiqib, har bir futbol klubi yuqorida ko‘rsatilgan masalaga, shuningdek, PFL hamda Sanitariya-epidemiologiya osoyishtalik agentligi o‘rtasida imzolangan sanitariya-gigiyena qoida va me’yorlariga qat’iy amal qilishi shart”, — deyiladi PFL bayonotida.
Eslatib o‘tamiz, Rossiyaning “Rostov” klubida koronavirusga chalinish holati qayd etilgan va asosiy jamoaning barcha a’zosi 14 kunlik karantinga olingandi. Keyinchalik jamoa chempionat doirasida “Sochi”ga qarshi kechgan o‘yinda yoshlar jamoasidagi futbolchilardan foydalanishga majbur bo‘ldi va 1:10 hisobida yutqazdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)