ПФЛ: Агар бир клуб футболчиси коронавирусга чалинса, бутун жамоа карантинга олинади

Профессионал футбол лигаси (ПФЛ) клубларни Суперлига ўйинлари вақтида санитария-гигиена қоидаларга амал қилишга чақирди.

ПФЛ барча футбол клублари вакиллари билан учрашиб, ўйин вақтида майдонга тупурмаслик ва оғиз чайқаганда сувни майдонга ташламаслик шартларини қўйди. Футболчиларга бунинг учун майдон четига жойлаштирилган махсус туфдонлардан фойдаланиши тавсия қилинган.

ПФЛ мазкур талаблар халқаро ташкилотлар томонидан маъқулланганини алоҳида таъкилаган.

«Бундеслига ва АПЛ бу масалага жиддий ёндашмоқда, ФИФА ҳам футболчиларнинг бу одатини тартибга солиш кераклигини айтмоқда. Жумладан, ФИФА медицина қўмитаси вакили Мишел Д’Хоге футболчилар ўйин вақтида айрим одатларидан воз кечиши кераклигини, биринчи навбатда майдонга тупуришни тақиқлаш кераклигини айтди: ‘Бу футболдаги одатий ҳолат, аммо гигиенага зид одатдир. Биринчи навбатда ундан воз кечиш керак, бунинг учун ҳатто сариқ карточка кўрсатиш лозим’.

Кембриж университети вирусологи Ян Брайерли бу борада шундай дейди: ‘Агар симптомсиз бемор майдонга тупурса, бу вирус тарқалиши учун потенциал ташувчига айланиши мумкин’. Оддий схема: COVID-19 ташқи муҳитда уч соатгача тура олиши ҳисобга олинса, вирус майдон чимидан тўпга, буцаларга, кийимга ва қўлга ўрнашиши, улардан кўз, бурун ва оғиз шиллиқ қаватларига тушиши мумкин. Табиийки, улар орқали инсонга инфекция юқиши осон», — дейилади ташкилот баёнотида.

Шунингдек, ПФЛ агар бирор клуб вакилида коронавирус аниқланадиган бўлса, бутун жамоа карантинга олиниши ва бу шундоқ ҳам ўзгариб кетган тақвимда янада мураккабликларни келтириб чиқаришини айтган.

«Бугунга келиб биз футбол мавсумидаги камида уч ойни бой бердик. Яъни, бирор клубда зарарланган футболчи ёки персонал аниқланса, бу бизга қимматга тушиши мумкин. Чунки ПФЛ олдида футбол мавсумини эсон-омон якунлаб олиш вазифаси турибди. Агар бирор футболчида зарарланиш ҳолати аниқланса, клуб карантинга олинади. Бу эса табиийки, ПФЛни ҳам, лиганинг қолган жамоаларини ҳам мураккаб вазиятда қолдиради. Шундан келиб чиқиб, ҳар бир футбол клуби юқорида кўрсатилган масалага, шунингдек, ПФЛ ҳамда Санитария-эпидемиология осойишталик агентлиги ўртасида имзоланган санитария-гигиена қоида ва меъёрларига қатъий амал қилиши шарт», — дейилади ПФЛ баёнотида.

Эслатиб ўтамиз, Россиянинг «Ростов» клубида коронавирусга чалиниш ҳолати қайд этилган ва асосий жамоанинг барча аъзоси 14 кунлик карантинга олинганди. Кейинчалик жамоа чемпионат доирасида «Сочи»га қарши кечган ўйинда ёшлар жамоасидаги футболчилардан фойдаланишга мажбур бўлди ва 1:10 ҳисобида ютқазди.