“Ko‘p savol beriladigan tadbirlardan qochamiz, yoshlar bilan muloqotga esa liderlarni chaqiramiz”. Zoir Mirzayevning o‘rinbosari hokim va yoshlar muloqotidagi muammolarni ochiqladi

Qashqadaryo hokimi o‘rinbosari Rustam Yo‘ldoshev viloyatda faoliyat yuritayotgan hokimlarning aksariyati yoshlar bilan muloqotda ko‘p savol beriladigan davradan qochishini, muloqotga muammosi bor yoshlarni emas, bugungi kunda ma’lum bilan darajaga erishgan liderlarni jalb qilishga urinishini ta’kidladi. Bu haqda “Daryo” muxbiri xabar berdi.

Ma’lum qilinishicha, 20-iyun kuni viloyatning Dehqonobod tumanida Zoir Mirzayevning o‘rinbosari Rustam Yo‘ldoshev ishtirokida yoshlar bilan matbuot anjumani tashkil etilgan.

Matbuot anjumanida so‘z olgan viloyat hokimi o‘rinbosari Rustam Yo‘ldoshev “Yoshlar oyligi” doirasida bo‘lib o‘tayotgan “Hokim va yoshlar” uchrashuvi haqida to‘xtalgan.

“Tan olish kerak, yoshlar bilan muloqot qiladigan tadbirlarimiz soni judayam ko‘p. Ammo natijaga kelganda oqsoqlanish bor. Nima uchun? Chunki biz rahbarlar ko‘pincha yoshlar bilan muloqotda ko‘p savol beriladigan davradan qochamiz, ular bilan muloqotda imkon qadar muammosi yo‘q liderlarni chaqirishga harakat qilamiz. Oqibatda muammosi bor yoshlar qolib ketaveradi”, — dedi Rustam Yo‘ldoshev.

Rustam Yo‘ldoshev ishtirokidagi matbuot anjumanida Yoshlar ittifoqi viloyat hamda tuman kengashi mas’ullari ham qatnashib, Dehqonobod tumanidagi faol va tashabbuskor yoshlarni rag‘batlantirdi. IIB tizimida ro‘yxatda turuvchi to‘rt nafar maktab o‘quvchisi ro‘yxatdan chiqarilganini ma’lum qilib, ushbu yoshlarni qo‘llab-quvvatlashga tayyorligini aytdi.

Eslatib o‘tamiz, Rustam Yo‘ldoshev joriy yil aprel oyida Zoir Mirzayevning yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimida faoliyat yuritgan Dolli Allayev o‘rnida ish boshlagandi.