Kitob tumani “qizil” hudud bo‘lishiga qaramay, tumanda transportlar harakati cheklanmagan. Oshxona va kompyuter o‘yinlari markazi ham faoliyat yuritmoqda (foto)

Qashqadaryo viloyatining Kitob tumani “qizil” hudud bo‘lishiga qaramasdan tumanda karantin talablariga rioya qilinmayapti. Bu haqda “Daryo”ga murojaat qilgan shahrisabzliklarning aytishicha, kitobliklarning Shahrisabz shahriga bemalol kirib-chiqishda davom etayotgani shahar aholisini tashvishga solmoqda.

“Daryo” muxbiri Otabek Qo‘ldoshev Kitob tumanida bo‘lib, karantin tartibiga qay darajada amal qilinayotganini kuzatdi.

Avvalo e’tiborimizni tortgan holat shu bo‘ldiki, nafaqat Shahrisabz shahri, balki barcha tuman aholisi ham “qizil” hudud — Kitob tumaniga bemalol kirib chiqmoqda. Boisi karantin posti bo‘m-bo‘sh, na IIB, na Milliy gvardiya xodimlari bor.

Tuman markazida hayot “qaynayapti”. Hamma ko‘chada. Ajablanarlisi, yo‘lovchi tashuvchi Damas’lar va yo‘nalishsiz taksilar ham faoliyatini davom ettirmoqda.

Kitob tuman hokimligining ma’lumot berishicha, koronavirus xavfi sabab yopilgan tumanda shaxsiy avtotransport vositalarida harakatlanishga ertalabki soat 7:00 dan 10:00 ga qadar, kechki soat 17:00 dan 20:00 ga qadar ruxsat etilgan. Yo‘nalishsiz taksi va jamoat transportlari harakati cheklangan.

“Daryo” muxbiri bilan suhbatlashgan shahrisabzlik Eldor Bobomurodov ham ayni kundagi holatdan tashvishlanayotganini bildirdi.

“Men va men kabi fuqarolar uchun oilamiz, yaqinlarimiz va farzandlarimizning sog‘lig‘i qadrli. Shuning uchun ham Kitob tumanidagi tartibsizlikni cheklash va tumanni Shahrisabz shahar va tumanidan vaqtincha ajratish kerak. Kitob tumani fuqarolarining Shahrisabz shahar va tumaniga o‘tishini cheklash, shuningdek, shahrisabzliklarni ham vaqtincha Kitobga o‘tkazmay turish lozim”, — deydi Eldor Bobomurodov.

Biz ko‘rgan holat esa tumandagi vaziyat hokimlik aytayotgan ma’lumotning teskarisi ekanligini ko‘rsatmoqda.

Tuman tibbiyot birlashmasi yonidagi umumiy ovqatlanish korxonalari — kafe, oshxona, choyxonalar ham xo‘randalarga xizmat ko‘rsatishda davom etmoqda.

Shuningdek, avtomashinalarni yuvish shoxobchalari, yo‘nalishsiz taksida yo‘lovchi tashish, jamoat transporti harakati, savdo majmualari, sartaroshxona va go‘zallik salonlari, kompyuter o‘yinlari, yaxna ichimlik savdo nuqtalarida ham har doimgidek ish qizg‘in.

“Agrobank”ning tuman filiali ro‘parasidagi chorrahada tuman markaziga kirish uchun tashkil etilgan karantin postida avtomobillar kirib-chiqishi to‘xtamayapti, shuningdek, dezinfeksiyalash ishlari ham bajarilmayapti.

Dezinfeksiyalash ishlariga mas’ul qilib belgilangan xodimning aytishicha, dezinfeksiya vositalari tugab qolgani va o‘z vaqtida yetkazilmagani bois shu holat yuzaga kelgan.

Eslatib o‘tamiz, Prezident Shavkat Mirziyoyev raisligida joriy yil 16-iyun kuni bo‘lib o‘tgan videoselektorda O‘zbekistonda koronavirus tarqalishi bilan bog‘liq vaziyat shu tariqa murakkablashib borsa, ba’zi viloyat va shaharlar qayta yopilishi ta’kidlangandi.

Prezidentning aytishicha, Toshkent shahri, Toshkent, Navoiy va Qashqadaryo viloyatlarida vaziyat murakkab bo‘lib turibdi. Toshkent viloyatida 734 holatdan 79 tasi, Navoiy viloyatida 108 ta holatdan 83 tasi, Qashqadaryo viloyatida 51 ta holatdan 48 tasida virus aholi orasida aniqlangan. Shuningdek, Navoiyda 25 ta, Toshkent viloyatida 22 ta, Qashqadaryoda 3 ta holatda virus manbasi hamon noma’lum bo‘lib turibdi.