Қашқадарё вилоятининг Китоб тумани «қизил» ҳудуд бўлишига қарамасдан туманда карантин талабларига риоя қилинмаяпти. Бу ҳақда «Дарё»га мурожаат қилган шаҳрисабзликларнинг айтишича, китобликларнинг Шаҳрисабз шаҳрига бемалол кириб-чиқишда давом этаётгани шаҳар аҳолисини ташвишга солмоқда.
«Дарё» мухбири Отабек Қўлдошев Китоб туманида бўлиб, карантин тартибига қай даражада амал қилинаётганини кузатди.
Аввало эътиборимизни тортган ҳолат шу бўлдики, нафақат Шаҳрисабз шаҳри, балки барча туман аҳолиси ҳам «қизил» ҳудуд — Китоб туманига бемалол кириб чиқмоқда. Боиси карантин пости бўм-бўш, на ИИБ, на Миллий гвардия ходимлари бор.
Туман марказида ҳаёт «қайнаяпти». Ҳамма кўчада. Ажабланарлиси, йўловчи ташувчи Damas’лар ва йўналишсиз таксилар ҳам фаолиятини давом эттирмоқда.
Китоб туман ҳокимлигининг маълумот беришича, коронавирус хавфи сабаб ёпилган туманда шахсий автотранспорт воситаларида ҳаракатланишга эрталабки соат 7:00 дан 10:00 га қадар, кечки соат 17:00 дан 20:00 га қадар рухсат этилган. Йўналишсиз такси ва жамоат транспортлари ҳаракати чекланган.
«Дарё» мухбири билан суҳбатлашган шаҳрисабзлик Элдор Бобомуродов ҳам айни кундаги ҳолатдан ташвишланаётганини билдирди.
«Мен ва мен каби фуқаролар учун оиламиз, яқинларимиз ва фарзандларимизнинг соғлиғи қадрли. Шунинг учун ҳам Китоб туманидаги тартибсизликни чеклаш ва туманни Шаҳрисабз шаҳар ва туманидан вақтинча ажратиш керак. Китоб тумани фуқароларининг Шаҳрисабз шаҳар ва туманига ўтишини чеклаш, шунингдек, шаҳрисабзликларни ҳам вақтинча Китобга ўтказмай туриш лозим», — дейди Элдор Бобомуродов.
Биз кўрган ҳолат эса тумандаги вазият ҳокимлик айтаётган маълумотнинг тескариси эканлигини кўрсатмоқда.
Туман тиббиёт бирлашмаси ёнидаги умумий овқатланиш корхоналари — кафе, ошхона, чойхоналар ҳам хўрандаларга хизмат кўрсатишда давом этмоқда.
Шунингдек, автомашиналарни ювиш шохобчалари, йўналишсиз таксида йўловчи ташиш, жамоат транспорти ҳаракати, савдо мажмуалари, сартарошхона ва гўзаллик салонлари, компьютер ўйинлари, яхна ичимлик савдо нуқталарида ҳам ҳар доимгидек иш қизғин.
«Агробанк»нинг туман филиали рўпарасидаги чорраҳада туман марказига кириш учун ташкил этилган карантин постида автомобиллар кириб-чиқиши тўхтамаяпти, шунингдек, дезинфекциялаш ишлари ҳам бажарилмаяпти.
Дезинфекциялаш ишларига масъул қилиб белгиланган ходимнинг айтишича, дезинфекция воситалари тугаб қолгани ва ўз вақтида етказилмагани боис шу ҳолат юзага келган.
Эслатиб ўтамиз, Президент Шавкат Мирзиёев раислигида жорий йил 16 июнь куни бўлиб ўтган видеоселекторда Ўзбекистонда коронавирус тарқалиши билан боғлиқ вазият шу тариқа мураккаблашиб борса, баъзи вилоят ва шаҳарлар қайта ёпилиши таъкидланганди.
Президентнинг айтишича, Тошкент шаҳри, Тошкент, Навоий ва Қашқадарё вилоятларида вазият мураккаб бўлиб турибди. Тошкент вилоятида 734 ҳолатдан 79 таси, Навоий вилоятида 108 та ҳолатдан 83 таси, Қашқадарё вилоятида 51 та ҳолатдан 48 тасида вирус аҳоли орасида аниқланган. Шунингдек, Навоийда 25 та, Тошкент вилоятида 22 та, Қашқадарёда 3 та ҳолатда вирус манбаси ҳамон номаълум бўлиб турибди.
Изоҳ (0)