Ўзбекистонда 11 июнь соат 23:00 дан 12 июнь соат 23:00 га қадар коронавирусга чалиниш билан боғлиқ 128 та ҳолат қайд этилди.
Янги касалланиш ҳолатлари
Касаллик қайд этилган ҳолатларнинг- 94 таси карантин муассасаларида;
- 26 таси аҳоли орасида (шундан 14 таси Тошкент шаҳрида, 5 таси Бухоро вилоятида, яна 5 таси Тошкент вилоятида, 2 таси Самарқанд вилоятида);
- 8 таси эса халқаро юк ташувчи автомашина ҳайдовчилари орасида (Тошкент вилоятида 8 та, Сирдарёда 1 та) аниқланган.
Андижон вилоятида 6 июндан буён энди коронавирусга чалиниш ҳолати қайд этилди. Карантин муассасасида бўлган 5 кишида вирус аниқланган.
Бир кун аввал Қашқадарё вилоятида 28 та янги ҳолат қайд этилганди, уларнинг бари Муборак туманида фаолият кўрсатувчи хорижий корхонанинг ишчилари эди. 12 июнь куни вилоятдаги карантин муассасаларида сақланаётган яна 17 кишида коронавирус аниқланди. ССВ Қашқадарёдаги янги касалликка чалиниш ҳолатларига изоҳ бермаган.
Аҳоли орасида коронавирус юқтириб олиш ҳолатлари 11 июнга нисбатан 12 тага, 10 июнга нисбатан биттага камайди.
Бухоро вилоятининг 3 та туманида аҳоли орасида коронавирусга чалиниш ҳолатлари қайд этилган. Жумладан, Шофиркон туманида яшовчи фуқаро тана ҳарорати кўтарилиб, шифохонага мурожаат қилган ва унда касаллик аниқланган. Яна бир бемор Жондор туманидаги «Вет-Фарм» МЧЖ сотувчиси ҳисобланади. Вобкент туманида яшовчи фуқаро ҳам тана ҳарорати кўтарилгани сабабли таҳлил топширган ва унда касаллик борлиги маълум бўлган.
Шунингдек, Самарқанд вилояти Ургут туманида яшовчи 2 нафар фуқарода ҳам коронавирус инфекцияси тасдиқланган. Айни пайтда ушбу ҳолатлар юзасидан эпидемиологик суриштирув ишлари олиб борилмоқда.
Тошкент шаҳри ҳар доимгидек аҳоли орасида коронавирусга чалиниш бўйича юқори кўрсаткич қайд этди. Пойтахтда 14 киши коронавирусни юқтириб олган. ССВ ва Санитария-эпидемиологик осойишталик агентлиги Тошкент шаҳрида аввалги кунларда аҳоли орасида касалликни юқтириб олиш билан боғлиқ баъзи тафсилотларни ошкор этди. Маълум бўлишича, 7 июнь куни Тошкентда коронавирус аниқланган 195 беморнинг 183 нафари битта компанияда ишлаётган қурувчилар бўлган. Касаллик юқтириб олган 183 киши билан бирга ишловчи 300 нафардан ортиқ ходим карантинга олинган. Мазкур 183 фуқаро Тошкент шаҳрига вилоятлардан келиб ишлаётгани ва сўнгги 14 кун ичида оила аъзолари билан бевосита алоқада бўлмагани сабабли уларнинг оила аъзолари карантинга олинмаган. Шунингдек, 11 июнь куни Тошкент шаҳри Чилонзор туманида яшовчи фуқаро ишга кириш мақсадида таҳлилдан ўтганда, унда касаллик борлиги аниқланган. Шунингдек, Шайхонтоҳур туманидаги Mediapark савдо мажмуасининг яна бир сотувчисида, Юнусобод деҳқон бозорининг яна 6 нафар сотувчисида, Сергели туманида касаллиги тасдиқланган такси ҳайдовчисининг отаси ва укасида коронавирус аниқланган.
Коронавирусдан даволаниш
12 июнь давомида 121 нафар бемор коронавирусдан соғайди. Шундан 120 нафари Тошкент шаҳридаги, 1 нафари эса Андижон вилоятидаги тиббиёт муассасаларида шифо топди.Беморларнинг 844 нафари Тошкент шаҳридаги даволаш муассасаларида, 248 нафари эса Ўзбекистоннинг 8 ҳудудидаги шифо масканларида даволанмоқда.
Ҳозирда касаллик қайд этилган жами 4869 нафар бемордан 3758 нафари соғайиб, даволаниш кўрсаткичи 77 фоизни ташкил этмоқда. Бу борадаги кўрсаткич 8 июндан бери энди 1 фоизга яхшиланди.
Даволаниш бўйича фоиздаги энг ёмон кўрсаткич Қашқадарёга тегишли бўлиб, бу ерда беморларнинг 11 фоизи (57 нафардан 6 нафари) даволанишга эришди.
Маълумот ўрнида, Жиззах, Сурхондарё ва Фарғона вилоятлари коронавирусдан холи ҳудуд бўлиб турибди. 4 нафар бемор қолган Қорақалпоғистон ҳам коронавирусдан холи ҳудудга айланишга яқин турибди. Андижонда 8, Хоразмда 14, Наманганда 15, Бухорода 16 нафар бемор қолди.
Аҳволи оғир беморлар
Айни пайтда тиббиёт муассасаларида даволанаётган 1092 нафар бемордан 13 нафари оғир, 2 нафари эса ўта оғир аҳволда. Ўзбекистонда коронавирус қайд этилган 15 мартдан шу кунгача аҳволи оғир ва ўта оғир бўлган беморлар сони бир вақтда 15 нафарга етмаганди.Бир сутка аввал ҳам аҳволи оғир беморлар 10, аҳволи ўта оғир беморлар 2 нафарни ташкил этаётганди. Аммо 12 июнь соат 10:00 ҳолатига кўра, аҳволи оғир беморлар сони 2 нафарга ошганди.
15 мартда эпидемия бошланганидан бери Ўзбекистонда 19 нафар бемор COVID-19 асоратлари оқибатида вафот этган. Июнь ойининг ўзида 4 нафар бемор вафот этди.
Карантиндагилар
ССВ маълумотларига кўра, ҳозирда Ўзбекистонда уй карантинида 25 100 нафар, стационар карантинда эса 23 628 нафар фуқаро тиббий кузатувда бўлиб турибди.Аввалги кунлардан фарқли ўлароқ Соғлиқни сақлаш вазирлиги 12 июнгача карантинга олинганлар ва карантиндан чиқарилганлар ҳақида маълумот бермади. Охирги марта 11 июнь куни берилган ахборотда Ўзбекистонда 458 539 нафар фуқаро карантинга олинган бўлиб, уларнинг 411 033 нафари карантиндан чиқарилгани маълум қилинганди.
Изоҳ (0)