Bu haqda bosh prokuror o‘rinbosari Adliya vazirligida tashkil etilgan “Davlat fuqarolik xizmati to‘g‘risida”gi qonun loyihasiga bag‘ishlangan matbuot anjumanida to‘xtalib o‘tgan.
Svetlana Ortiqova muhokamaga qo‘yilgan “Davlat fuqarolik xizmati to‘g‘risida”gi loyihasi aynan davlat fuqarolik xizmatchilari orasida korrupsiyani tag-tugi bilan yo‘q qilishga qaratilganini ta’kidladi.
“Davlat fuqarolik xizmatchilarini deklaratsiya qilish kerakmi? Albatta, kerak. Ammo qonun loyihasida nazarda tutilgan alohida davlat xizmatchilarining faoliyati alohida qonun bilan belgilangan. Ularning ish vaqti, ularga bo‘lgan talab, unvonini hisobga olish kerak”, — deydi Ortiqova.
O‘zbekiston Prezidentining 2017-yildagi Parlamentga murojaatnomasida ham, 2020-yilgi davlat dasturida ham korrupsiyaga qarshi kurashishda alohida preventiv mexanizm kerakligi ta’kidlangan. Ayni vazifani amalga oshirish uchun xalqaro tajribani o‘rgangan holda, milliy va xorijiy ekspertlar ishtirokida hozirgi vaqtda Prezidentning alohida hujjat loyihasi tayyorlangani, qonun bilan belgilangan tartibda mutasaddi idoralar bilan kelishuv jarayonidan o‘tayotgani bildirildi.
Mavzuga doir: Deputatlar tomonidan O‘zbekistonda qurilish sohasini korrupsiyadan xoli qilish masalasi muhokama qilindi
Bosh prokuror o‘rinbosari korrupsiya ko‘proq mansabdor shaxslarga taalluqli ekanligi, biroq oddiy fuqarolar shunga zamin yaratishini ta’kidladi.
“Agar men korrupsiyaga aralashmasam, davlat budjetidan mablag‘larni talon-toroj qilmasam, ertaga oila a’zolarimning hayoti sifatli bo‘ladi. Chunki budjet qanchalik boyisa xalq boy bo‘ladi, xalq boyisa, uning bir kichkina namoyandasi bo‘lib, Ortiqova ham boy bo‘ladi.
Hayotimiz sifati nima degani? Ta’lim, tibbiyot, yo‘llar, qurilishlar va butun hayotimiz sifatli bo‘ladi degani. Kelinglar, bugundan boshlab, korrupsiyaga qarshi kurashaylik. Prezident g‘oyalarini mag‘zini chaqaylik va qaysi loyiha umumxalq muhokamasiga qo‘yilgan bo‘lsa, uni ekspertlar bilan maslahatlashib, keyin o‘z fikrimizni bildirsak, huquqiy davlatni qurayotgan ekanimizni isbotlagan bo‘lamiz”, — deydi Ortiqova.
Brifingda, shuningdek, bosh prokuror o‘rinbosari jurnalistlarning davlat fuqarolik xizmatiga kirishda bir marta korrupsiya bilan ayblanib, jinoiy javobgarlikka tortilgan shaxs bir umr xizmatga qo‘yilmasin, degan talab kiritilish bo‘yicha iltimosini qo‘llab-quvvatladi. Ayni masala ekspertlar guruhi tomonidan ko‘rilishi, shaxs aybidan oqlangan taqdirdagina xizmatga tiklanishi mumkinligini ta’kidlar ekan, Ortiqova ushbu masala milliy qonunchilikda ham o‘z aksini topganini bildirdi.
Eslatib o‘tamiz, joriy yilning fevral oyida Svetlana Ortiqova Xalqaro press-klubning ijtimoiy sohaga bag‘ishlangan sessiyasida halollik vaksinasi nafaqat prokurorlarga, balki barcha davlat xizmatchilariga kerakligini bildirgan edi.
Mavzuga doir:
- “Ba’zi voqealar sabab prokurorlarning kayfiyati sinib qoldi”. Svetlana Ortiqova tizimdagi poraxo‘rliklar haqida gapirdi
- “‘Bajaramiz’, ‘yest’ qilamiz, degan odamlar endi ishlolmaydi. Ko‘p odamlar bilan xayrlashaman” — Shavkat Mirziyoyev
- O‘zbekistonda so‘nggi ikki yilda uch rektor va besh prorektor ta’lim bilan bog‘liq jinoyatlari uchun javobgarlikka tortildi
Izoh (0)