Светлана Ортиқова: Коррупция кўпроқ мансабдорларга тааллуқли, аммо фуқаролар шунга замин яратади

Бу ҳақда бош прокурор ўринбосари Адлия вазирлигида ташкил этилган «Давлат фуқаролик хизмати тўғрисида»ги қонун лойиҳасига бағишланган матбуот анжуманида тўхталиб ўтган.

Светлана Ортиқова муҳокамага қўйилган «Давлат фуқаролик хизмати тўғрисида»ги лойиҳаси айнан давлат фуқаролик хизматчилари орасида коррупцияни таг-туги билан йўқ қилишга қаратилганини таъкидлади.

«Давлат фуқаролик хизматчиларини декларация қилиш керакми? Албатта, керак. Аммо қонун лойиҳасида назарда тутилган алоҳида давлат хизматчиларининг фаолияти алоҳида қонун билан белгиланган. Уларнинг иш вақти, уларга бўлган талаб, унвонини ҳисобга олиш керак», — дейди Ортиқова.

Ўзбекистон Президентининг 2017 йилдаги Парламентга мурожаатномасида ҳам, 2020 йилги давлат дастурида ҳам коррупцияга қарши курашишда алоҳида превентив механизм кераклиги таъкидланган. Айни вазифани амалга ошириш учун халқаро тажрибани ўрганган ҳолда, миллий ва хорижий экспертлар иштирокида ҳозирги вақтда Президентнинг алоҳида ҳужжат лойиҳаси тайёрлангани, қонун билан белгиланган тартибда мутасадди идоралар билан келишув жараёнидан ўтаётгани билдирилди.

Бош прокурор ўринбосари коррупция кўпроқ мансабдор шахсларга тааллуқли эканлиги, бироқ оддий фуқаролар шунга замин яратишини таъкидлади.

«Агар мен коррупцияга аралашмасам, давлат бюджетидан маблағларни талон-торож қилмасам, эртага оила аъзоларимнинг ҳаёти сифатли бўлади. Чунки бюджет қанчалик бойиса халқ бой бўлади, халқ бойиса, унинг бир кичкина намояндаси бўлиб, Ортиқова ҳам бой бўлади.

Ҳаётимиз сифати нима дегани? Таълим, тиббиёт, йўллар, қурилишлар ва бутун ҳаётимиз сифатли бўлади дегани. Келинглар, бугундан бошлаб, коррупцияга қарши курашайлик. Президент ғояларини мағзини чақайлик ва қайси лойиҳа умумхалқ муҳокамасига қўйилган бўлса, уни экспертлар билан маслаҳатлашиб, кейин ўз фикримизни билдирсак, ҳуқуқий давлатни қураётган эканимизни исботлаган бўламиз», — дейди Ортиқова.

Брифингда, шунингдек, бош прокурор ўринбосари журналистларнинг давлат фуқаролик хизматига киришда бир марта коррупция билан айбланиб, жиноий жавобгарликка тортилган шахс бир умр хизматга қўйилмасин, деган талаб киритилиш бўйича илтимосини қўллаб-қувватлади. Айни масала экспертлар гуруҳи томонидан кўрилиши, шахс айбидан оқланган тақдирдагина хизматга тикланиши мумкинлигини таъкидлар экан, Ортиқова ушбу масала миллий қонунчиликда ҳам ўз аксини топганини билдирди.

Эслатиб ўтамиз, жорий йилнинг февраль ойида Светлана Ортиқова Халқаро пресс-клубнинг ижтимоий соҳага бағишланган сессиясида ҳалоллик вакцинаси нафақат прокурорларга, балки барча давлат хизматчиларига кераклигини билдирган эди.