O‘zbekistonda xususiy bandlik agentliklari to‘g‘risidagi qonunga o‘zgartirish kiritiladi

Qonunchilik palatasi deputati va “Yuksalish” umumilliy harakati raisi Akmal Burhonov “Xususiy bandlik agentliklari to‘g‘risida”gi qonunga kiritilayotgan o‘zgartish va qo‘shimchalar haqida ma’lumot berdi.

Deputatning yozishicha, shu kunlarda Qonunchilik palatasida Vazirlar Mahkamasi tomonidan kiritilgan “Xususiy bandlik agentliklari to‘g‘risida”gi qonunga o‘zgartish va qo‘shimchalar kiritish haqidagi qonun loyihasi ko‘rib chiqilmoqda. Ushbu mavzu dolzarb bo‘lganligi uchun Akmal Burhonov loyihada taklif etilayotgan bir qator muhim o‘zgarishlarni keltirib o‘tgan:

1. Xorijda ish qidirayotgan shaxslarni ishga joylashtirish bo‘yicha ko‘rsatilgan xizmatlar uchun to‘lovlarni chet ellik ish beruvchi hisobidan amalga oshirish mexanizmi joriy etiladi;
2. Xorijda ish qidirayotgan shaxslarni ishga joylashtirish bo‘yicha xizmatlar ko‘rsatish uchun Bandlik va mehnat munosabatlari vazirligi huzuridagi jamg‘armaga zaxira qilib qo‘yiladigan mablag‘larni milliy valyutada bazaviy hisoblash miqdori 8 500 baravari (taxminan 185 ming AQSh dollari) miqdorida etib belgilanmoqda (hozirda ushbu miqdor 50 ming AQSh dollarini tashkil etadi);
3. Xususiy bandlik agentliklari tomonidan ishga joylashtirish sohasida axborot va maslahat xizmatlari ko‘rsatilgan taqdirda, bazaviy hisoblash miqdorining bir baravaridan oshmagan miqdorda haq olinadi;
4. Xususiy bandlik agentliklari tomonidan xizmatlar ko‘rsatish to‘g‘risidagi shartnomalari Bandlik va mehnat munosabatlari vazirligining “labor migration” dasturiy majmuasida real vaqt rejimida ro‘yxatdan o‘tkazish tartibi joriy etiladi;
5. Xususiy bandlik agentliklari tomonidan xorijda ish qidirayotgan shaxslarni ishga joylashtirish bo‘yicha xizmatlar ko‘rsatishdan oldin ularga ko‘rsatiladigan xizmatlar uchun to‘lovlar undirilmasligi belgilanmoqda.

Xususiy bandlik agentliklari muammosi 2019-yil dekabrida Oliy Majlis Senatida qizg‘in bahs-munozaralarga sabab bo‘lgandi. Xususan, senator Farrux Dadaxo‘jayev migrantlarning mablag‘larini himoya qilish mexanizmi yo‘qligi uchun Bandlik va mehnat munosabatlari vazirligini tanqid qilib, agentliklar bilan bank hisob-kitoblarini akkreditiv asosida olib borishni taklif qilgan edi.

O‘z navbatida, Bandlik va mehnat munosabatlari vazirligi qonunga o‘zbekistonliklarni xorijda ishga joylashtirish bo‘yicha vijdonsiz xizmat ko‘rsatilishidan himoya qila oladigan tuzatishlarni kiritish niyatini bildirgan edi.